زمان فى أبوظبى
أبوى جا من الدوام مبسوط وسألتو وقال لى كدى أصبر لى والله جبت ليك خبر سمح بالحيل
وبعد ما راق طلع لى رساله شكلها غريب ملونه ومزركشه وبالانقليزى
عاينت ليها وقلت ليهو دى شنو ؟ قال لى دى جاتنى من ألمانيا وهى سحب حق يانصيب
وكل اللى ح أدفعو 30 دولار بس
قلت ليهو والله تمام .. ومشينا الصرافه ودخلنا ال30 دولار ورسلنها ، بعد شهر ردو وقالو
ليهو إنت تأهلت مع خمسه ألف على مستوى العالم والمطلوب ترسل 80 دولار
وتانى رسلناها وتانى ردو وقالو ليهو انت تأهلت مع تلاته ألف على مستوى العالم والمطلوب
ترسل 150 دولار ، قمت قلت ليهو يا أبوى ديل خواجات أولاد لذينا
والله تباريهم يدفعوك دم قلبك قام نهرنى وقال لى والله أفوز ما أديك معاى وبسافر وبخليك هنى
أها عمك .. بقى الخواجات كل مره ينقصو ليهو العدد ويطلبو منو يحول وهو يشيل ويحول
لحد ما جانى يوم وهو فرحاااان وقال لى خلاص إتصفينا على 50 بس وشوف إسمى أنا تالت واحد
وطلبو منو يحول 600 دولار
أنا شلتو وختيتو إنو ما يحول وهو قعد يقول لى إنتا ما بتقرا جرايد ؟ اليانصيب العالمى دا معروف
وقام حول ليهم وتانى ردو عليهو وقالو ليهو إنتو بقيتو عشره بس على مستوى العالم
وقالو ليهو تحول ألف دولار للسحب قبل الأخير
عمك .. ضربت ليهو فى راسو .. ما عندو ألف دولار ؟ غايتو إدين ليهو ألفين درهم
وباع تلفزيونا وباع الفيديو وإشترى تلاجه جديده بالشيكات وباعها بالخساره بالكاش
ودخل الألف دولار فى الظرف وجا ، جانى يصفر ولما لقانى زعلان قعد يهظر معاى وقال لى
أنا جريت ليهم السبحه إن شاء الله ح نفوز بال 30 مليون دولار دى وبكره تقول أبوى قال
أهااااا .. الليل كلو وهو يسبح ساااااااى وبعد كم يوم كدا أنا كنت بحلق فجأه شفت ليك ظرف ذى البيجن
لأبوى بدون ما أشعر إتناطيت ليهو حتى الحلاق قرب يقرم أضانى وعاينت ليهو
أكان ألقاهو ليك ذى الرسايل اللى بتجى لأبوى بالكربون وسألت الحلاق وقال لى ديل خواجات حراميه
بياكلو فى قروش الناس قلت ليهو ما تجرب امكن صادقين
قام قال لى هم كاتبين لى .. نحنا بقينا كم مؤهلين للسحب على مستوى العالم ؟
قلت ليهو عشره بس وأبوى معاكم .. قام جر لى كرتونه وبهلها لى وقال لى شوف
أكان لقيت 38 رساله مرسله لأشخاص بنفس الكلام
طوالى قلت ليهو النص الحلقتو دا أعمل لى ليهو قطعيه والنص التانى بجيك ليهو بكره
هو رفض لكن كلفتو وشلت الكرتونه وجيت البيت ومنتظر أبو بفارغ الصبر وقام جا
عمك يصفر ساااااااااى ، وقال لى بكره مواعيد الرساله وإن شاء الله بكون من الخمسه
على مستوى العالم وبفوز بالسحب الأخير وضربنى بسبحتو يعنى ضربة شيخ طريقه
قمت بهلت ليهو الكرتونه ، وعاين ليها وفتح الظروف وعينك ما تشوف إلا النور
أى حاجه قدامو شاتها ، أنا قمت جارى هع هع هع
وبكره جاب الرساله وجا ولقاهم فعلا قالو ليهو إنت بقيت من الخمسه النهائيين على مستوى العالم
ومطلوب ترسل 1500 دولار للسحب النهائ
عمك .. جاب جوز فلوسكاب ولم ليك فيهم شتيمه بالطريقه الصاح
ودعاهم دعا لما قال بس ، وكلو بالعربى ، والله الساعه اليقول ليهم حق وليداتى
يعمل ليكم ويسوى ليكم أنا أموووووت بالضحك ورسل ليهم الرساله
وطلعو فعلا ناس نصابين
أهااا .. عمك بعد فتره جابنى من أبوظبى وورثنى الجزيره وشتت السودان نهائ
وقبل كم يوم وصلت فى بريدنا نفس الرسائل موجهه لعمك وهو فى السودان ليهو أكتر من 15 سنه
ضربت ليهو كلمتو وقلت ليهو هم طالبين 500 دولار أحولها ليهم
قال لى
_ حولها لى أنا الحول اليخليهم يكابسو . هم لسه متلحنى ؟
رد مع اقتباس
المشاركة الأصلية كتبت بواسطة safoo
المفضلات