جرت العاده في كل الدول المتقدمة والغير متقدمه أو بي إختصار شديد في كل الدول البتفهم وبتقدِّر معني قيمة الإنسان، إنو لمن تكون في صيانة طرق بتكون في معاها تحويلات وطرق بديله وعلامات تنبيه وإجراءات سيفتي
لأمن وسلامة البني آدم الرخيص ده، بتكون في دراسه لي إنو لو ما كُل الإمكانيات مُتاحه لي سفلتت قطاع معين خلال فتره وجيزه ما المفروض يكسرو الشارع أو يقفلوه أمام الحركة.
الشارع القدام بيتنا ده عملوه الصينيين سنة حفرو البحر وإستمر لي فتره طويله جداً من دون ما تظهر فيه حفره واحده لحدي ما جو ناس مين كده تيل وخراباتيل وحفيرتيل وعشوائياتيل وبرضو الإمور كانت ماشه كويس.
أخيراً جو ناس نظيراتيل قالو عاوزين يعملو الشارع إتجاهين ويقسموه بي جزيره في النص قلنا خير
أهو برضو فكره جميله وجو ناس لغفاتيل جابو ليهم كم قرقريبه وكم برميل عجين وقالو دايرين يعوسو زلط
الفتره ديك انا شغال مدير لي أحدث خلاط أسفلت ألماني إستوردتو شركة هجليج لي سفلتت المشاريع المصاحبه لي سد مروي. ( وأحدث دي طبعاً لأنو إنتاجو حوالي ألف طن في اليوم وحا يجيب قروش كتيره كتيره سريع سريع وليس لأنو حا يطلع مواصفات دقيقه لأنها ما مهمه كتير في نظر الكتير).
المهم في الأمر أخدت لي إجازه صغيرونه كده جيت مدني ولقيت ليك العك قدام بيتنا والترقع بس زكرني ليك الحلاق الهندي الغلبو يحلق شعري داك. قسماً بالله العظيم انا طالع من السوق الشعبي بي رجلي لقرب المسافه للبيت ولي شوقي الشديد للمشوار البقطعو مية مره في اليوم ماشي جاي داك لمن شفت المعركه المدوره في الشارع دي أكرر قسماً بالله ما فضل لي إلا أبكي وطوالي من دون ما أشعر مشيت للجماعه وإتناقشت معاهم ولقيتم ليك اللهم ناس ودايرين يسوو زلط وأسياد الزلط دايرين زلط.
عدت أيام علي الموضوع ده وبدت الحفر تظهر قبل الشارع ما يسمعن بيه باقي الشوارع أولاد عمو وكل يوم الحفر ماشه زايده وفي فتره بسيطه جداً بقيت محتاج لي خبره كافيه في ليدو السلم والثعبان عشان تصل تقاطع أبو جبل.
هسي اليومين ديل الشارع شغالين فيه إعادة تأهيل ناس شريان الشمال وبحكم خبرتي السابقه معاهم في طريق شريان الشمال الإشتغلوه طبقه بارده وكنت واحد من إصطاف هجليج العملو لي نفس الطريق إعادة تأهيل بعد فتره بسيطه لمن شاحنات السد شالت معاها الأسفلت في لساتكها ومشت بيه
بحكم خبرتي معاهم الناس ديل أخدو خبره كويسه وأحسن من غيرم كتير بقو في المجال ده مع إنو المجال ده انا أساساً ما شايف ليه ديك الصعوبه، الشغلانه عباره عن مواصفات خلطه بي نسب معينه وبتتكون من البتومين وكم نوع من أنواع الحجر ( مربط الفرس إنو الحجر ال 8\3 غالي وشوية مويه كده من الخور كبينا واللبيب بالإشارةِ يفهمُ)والباقي علي مهندسين المساحه.
الله يوفقكم يا ناس شريان الشمال في إعادة التأهيل ويوسع رزقكم ويديكم الفي مرادكم ( عك كتير تعيدو تأهيلو)
بس عليكم الله ولو سمحتو وبعد إذنكم وأرجوكُم وأترجاكم تعالو شيلو كراكاتكُم دي من قدام خشُم بابنا وأفتحو الشارع خلو قلاب التراب ده يخُش عشان نقدر نكمل البيت المفرتق ده قبال الخريف ما يفاجأنا
عليكم الله سريع لأنو في إجازات ومناسبات وحاجات كتييييييييره مرتبطه بالموضوع ده.
عليييييييييييكم الله سريع لأنو انا قروشي كملت تلفونات كلُ يوم جو وللّا ما جو؟؟؟
رد مع اقتباس
المشاركة الأصلية كتبت بواسطة الجندي المجهول
المفضلات