سلسلة مواقف

[ود المطامير]

زمان وأنا فى السودان
كنت بمشى الساعه 2 لكلية كمبيوتر مان أجيب أم عمرو
كنت بنتظرها أمام بوابة الجامعه وأقعد فى البكسى حقى أتلفت فى خلق الله السمحين ولينين ديل
أمام البوابه وتحت شدره كان فى شاب من المعاقين حركيا قاعد وأمامه حله كبييييييره
مليانه مويه وتلج وشفت الطلاب بنات وأولاد بشربو وبمشو
وأخوكم طوالى كلما أعطش بنزل من البكسى وبصنقع لى بكوز أكان كوزين وبرجع للبكسى
وتجى أم عمرو ونشتت

الحكايه دى إستمرت إسبوع لحد ما يوم صنقعت بكم كوز وأنا قاعد فى البكسى أكان أشوف
ليك بنت أدتو قروش وتانى جا واحد شرب وأداهو قروش
وحاة الله أنا بقيت قدر النمله وجسمى كلو قال زنننننننننننننننننن
نزلت ومشيت ليهو وقلت ليهو .. ياخى أنا والله آسف جدا جدا
إفتكرتك تابع للجامعه وكدا وسألته وقلت ليهو
ياخى ليه ما قلت لى أدفع

والله الحق .. رد على بإبتسامه عريييييضه وصاااااافيه فقط

وكان موقف خالد فى الذاكره بإذن الله

[ود المطامير]

يلا المكرفون معاكم أحكو لينا المواقف اللى مرت بيكم

[ود المطامير]

عليكم الله البوست دا مش يستاهل يثبتوه مكان بوست النواعم ؟

[ام ساره]

ود المطامير ياخ حرام عليك انت ماشايف الحلة كنتا مفتكرها زير ولا شنو؟ امانة في زمتك هي موية وفي حلة ومعاها تلج وكوز يعني ماقرعة وتكون مجاني بالغت جنس بوليغ.

[ود المطامير]

ود المطامير ياخ حرام عليك انت ماشايف الحلة كنتا مفتكرها زير ولا شنو؟ امانة في زمتك هي موية وفي حلة ومعاها تلج وكوز يعني ماقرعة وتكون مجاني بالغت جنس بوليغ.

هع هع هع هع

وحاة الله كل يوم أجى وأصنقع بالكوز وكرطعه جد

وأخت الكوز وأرجع وتانى ساعه ساعتين أكررها

والغريب قدر ما حاولت أحاسبو وقلت أقدر عدد المرات الشربت فيها هو حلف

[أحمد عمر ( MOODY )]

أول حاجة .. أحييك على البوست ده
بعد داك .. أدينا الإذن ننداح ليك فيهو
باقي .. المواقف كتييييييييرة

[mahagoub]

انت محنك وشلاقتك دى حتى مع المعاقين
الراجل بدل يشحد قال يسترزق
وبصنعته لطافه البدفع يدفع
والما عنده يشرب ويمشى

[ود المطامير]

أول حاجة .. أحييك على البوست ده
بعد داك .. أدينا الإذن ننداح ليك فيهو
باقي .. المواقف كتييييييييرة

يديك العافيه يا فرده
وإنتا ما بتشوف أهاا

يلا المكرفون معاكم أحكو لينا المواقف اللى مرت بيكم

[ود المطامير]

انت محنك وشلاقتك دى حتى مع المعاقين
الراجل بدل يشحد قال يسترزق
وبصنعته لطافه البدفع يدفع
والما عنده يشرب ويمشى

والله يا عمك داك كان موقف رهيييييب

بالجد شاب فى منتهى النُبل الجميل

[ود المطامير]

رمضان اللى فات
يوم فاتتنى صلاة العشاء ولما جيت البيت قلت أصلى العشاء والتراويح
قامت أم عمرو لما شافتنى داير أصلى قالت لى دقيقه نحنا ما صلينا وخلاص صلى بينا

بينى وبينكم إتكيفت جدا وقلت والله تمام الواحد يؤمم أهل بيتو مره مره عشان
يكون غدوه للشفع
أهااا ... كلهم وقفو وراى ، أم عمرو وشجن شمارات وعمرو وعمار
وصليت ليك بيهم العشاء ذى الورد ، الركعه الأولى بالفاتحه ومعاها الإخلاص
والركعه التانيه الفاتحه ومعاها الفلق

أهااا لما جيت للتراويح قلت لنفسى ياود نوع ليهم بين قِصار السور والسور الطويله
والركعتين الأوائل صليت بيهم ذى الورد

أهااا ... لما دخلت فى الركعه التالته وبعد الفاتحه بديت أقرأ سورة المزمل
أكان لقيت ليك روحى كلما أقرأ شويه شجن شمارات تصلحنى وخاصه فى التشكيل
يازول الآيه الواحده مرات تصلح لى قرايتى مرتين
وأمها تكتم فى ضحكتها هى وعمرو وعمار سامع الضحك المكتوم وبقى يضحك
بصوت على وهو ولا عارف الحاصل شنو ؟

غايتو بس سلمت ليك باليمن بس وإتلفت ليك عليها وخمشتها ليك من رقبتها وقلت ليها

_ إنتى وكت حافظه قدر دا ما تجى تصلى بينا

[أحمد عمر ( MOODY )]

فعلاً في حياة كل واحد مواقف ما بقدر ينساها أبداً مهما طال الزمن وإن كان بعضها لا يخلو من طرافة أو إحرج لكن فيها عظمة و نُبل الإنسان السوداني
في يناير 1996 .. الوقت داك أنا كنت لسّه طالب في الجامعة و كنت قاعد مع ناس خالتي في حي الصفا
و صادف الأيام ديك كان عندنا عرس خالي في مدني و ناس البيت كلهم سافروا العرس إلاّ أنا و رامي ود خالتي كان عندنا إمتحانات .. المهم نحنا قبل الإمتحانات كان عندنا إسبوع إجازة عشان تسليم مشروع السنة .. أها يوم الخميس آخر يوم دراسة الموضوع خمّر لي في راسي قلت أخفس .. أكتل العرس يوم الجمعة و أجي بعد داك أكل ناري .. المهم جيت كلمّت رامي قلت ليهو يا زول أنا بايعك و بكرة الصباح ماشي مدني زولي قام أتجرّس - أمشي .. ما تمشي - رقدنا نومنا و تاني يوم الصباح من دغشاً بدري إتخارجت على السوق الشعبي ولغاية ما وصلت كان عندي قروش فكة في جيب البنطلون .. ما فتحت المحفظة إلاً قدّام شباك التذاكر و لقيت ليكم المحفظة خاوية على عروشها .. أها بتاع التذاكر في الكاونتر إسمو أحمد سليمان من أولاد أم درمان - طبعاً بقت لي معاهو صُحبة - لمّا شافني بفتِّش قال يا زول مالك .. قلت ليهو ياخ معليش رجع التذكرة أنا لغيت السفر .. قال لي ما ممكن يوم الجمعة الصباح بدري كده تلغي السفر ساكت و إنت شكلك ود ناس يا زول مالك خير في شنو ..؟ قمت حكيت ليهو القصة
قال لي زول و لا يهمّك أنت عندك مشكلة لمّا توصل أهلك في مدني قلت ليهو لا .. قال لي يا زول خلاص خلّيها علي و فعلاً مشيت مدني و حضرت العرس و لمّان جيت راجع جِبْتَ القروش للراجل بتاع التذاكر .. الزول حلف راسو و ألف سيف ما يشيل القروش و قال لي بالحرف : ياخ أنت قالوا ليك نحنا ما أولاد عرب و من اليوم داك و لغاية ما إتخّرجت و جيت راجع الإمارات كلمّا أكون مسافر بمشي للزول كامل الدسم أحمد سليمان في السوق الشعبي و بسلِّم عليهو .. لكن للأسف بعد التحويل للميناء البرِّي ما عرفت ليهو طريق

[ود المطامير]

الحبيب مودى

رائع والله وموقف فيهو كل روعة وصفاء أهلنا

وحكمة ربنا فى نسيانك للقروش لكى تتولد الصُحبه الجميله

كتر وهات تانى وتانى وتانى

[محمد عبد الله عبدالقادر]

هع هع هع هع

وحاة الله كل يوم أجى وأصنقع بالكوز وكرطعه جد

وأخت الكوز وأرجع وتانى ساعه ساعتين أكررها

والغريب قدر ما حاولت أحاسبو وقلت أقدر عدد المرات الشربت فيها هو حلف

يا الخفيف اللفيف انت كنت بتقعد قدر شنو قدام الجامعه تتنظر في ام عمرو!!؟؟؟؟؟

هو كان انتظار ليها ولا بتكحل عيونك ساي!!!!!!!!!!!؟؟؟؟؟؟؟؟؟؟؟

[ود المطامير]

يا الخفيف اللفيف انت كنت بتقعد قدر شنو قدام الجامعه تتنظر في ام عمرو!!؟؟؟؟؟

هو كان انتظار ليها ولا بتكحل عيونك ساي!!!!!!!!!!!؟؟؟؟؟؟؟؟؟؟؟

هع هع هع هع

حبيبنا والله زارتنا البركه

هى لكن جامعة نُصاح ؟ وحاة الله يا الله عشان تفرز البت من الولد

والبنات وحاة أمى نار منقد عديييييييل كدا

حنكشه على النعمه نحنا المغتربين ديل ما لاقين ربعها

[ود المطامير]

مره مشيت ناس جدى خال أمى فى الرياض
وهو دكتور ما شاء الله تبارك الله وكان وزير شئون المغتربين
أيام حكم ( عمو نقّه )
أهااا .. لقيتو ليكم كان عازم ناس رفيعين المستوى والعربات دى أشكال وألوان وترقش
مع لمبات الشارع ، وأخوكم طبعا جايى ببكسى ومطرقع
والصندوق مليان بعر غنم ودقيق مكشوح ومخلفات الجداد وعيييييك

أهااا ... يا زول قلت لنفسى هسى أنا أوقفو فى نص ديل ؟ دا ح يكون ظاهر ذى الشامه فى الخد
أختى قالت لى أمشى دسو ورا الفيلا ، رفعت يدى وقلت ليها بديك كدا هسى
وقلت ليها والله أكان أوقفو هنى وخشيت ليك بين ليلى علوى كرت ومرسيدس فاخر
وطبعا الفرامل حقتى 80 % هوا ساى وقربت أطق ليك المرسيدس
وأختى قالت لى أعمل حسابك والله تخرشو أكان تعمل ليهو تتنس
وأنا ملخوم قلت ليها أسكتى يا ترب المسخه

غايتو .. عاينت ليهو كدا بين العربات ذى السن الهرمه ودخلنا
وبالليل بعد ما الناس مشو دخلت البكسى جوه الحوش خايف عليهو يسرقوهو

وحكمة الله تانى يوم شفع جدى إتعلقو بيهو ورادهو أكتر من عربيتهم ليلى بت علوى

[ود المطامير]

زمان كنت طواالى بشاغل ( ود الطاهر ) الله يطراهو بالخير
بشاغلو وبقول ليهو إنتا مديرك أفغانى

والوكت داك نحنا كنا بلديه وحكومه يعنى
أهااا ... لف يا زمن ولف يا زمن وخصخصو البلديه
وبقينا شركات وهسى مديرنا هندى

عليكم الله لو ود الطاهر عرف المعلومه دى بخلينى أنوم ؟

[mahagoub]

زمان وانا عمرى خمسه سنوات
الوالد الله يرحمه كان بجى من الشغل
يشغل مروحة الطربيزه
ويخت قداما صحن كبير
مليان مويه
هبة المروحه على المويه
بتعمل ليه رطوبه فى الجو
ونام
اجى انا يا شافع الجن ومعاى قلم
قلت ادخله فى المروحه
ما اسمع ليك الا طاخ وطيخ
وابوى قام مخلوع ولقانى قدامه
وبالمركوب خبطه واحده
بعدا ما قدرت امشى بحبى لمان طلعت من الاوضه

[خالد أحمد الصول]

زميلي ابراهيم كان دوره في البعثات القصيرة فذهب الي هولندا ... و كتب لي من هناك يقول لي أنه قد ذهب الي مرقص (ديسكو) و في غمرة حماس رقص بريك دانص فتوقفت الصالة كلها و صاروا يتحلقون حوله و ينظرون في تعجب ... فقال لي ... علمت ليك الخواجات كيف يرقصوا البريك دانص ... و إكتشفت ليك الوهم ديل ما عارفين حاجة ... و بعد مرور شهر أرسل لي في خطاب أنه يشعر الان بخجل شديد لانه عندما كان يرقص في تلك الصاله رقصة البريك دانص كان الخواجات يتفرجون في القرد القادم من إفريقيا و الذي يؤدي في رقصة إنقرضت من العشرينيات

[mahagoub]

الشلاقات ما نتنتهى
وشقاوتنا ونحنا صغار ما ليها حد
مره الوالده قاعده وخاتا كانونه قدامها
وبتقلى فى البن لعمل قهوة العصريه للوالد
يرحمهما الله
وظبطت القهوه وانتهت ولملت عدتا
وشالتا ودخلت البرنده
قمت انا الشليق مشيت على المنقد
لقيت النار هبدت
قلت النار دايره تموت احسن اكب ليها جاز تولع تانى
وجبت قزازة الجاز
وكبيت فى الجمر ولسه ما عدلت ايدى
القى النار ضربت فى السقف
وارمى القزازه ومن محلى داك والشارع التانى بعد البيت
وكانت فى عباره وتحت العباره
لحدى ما الدنيا فللت
لمان ضلمت توكلت على البيت
لقيت الراكوبه كلها فى الارض
ما حاقول ليكم الوالد سوى فينى شنو؟؟
تموها خيال

[ود المطامير]

عم محجوب
والله لكن لقيت خترى خلاص

ونحنا نقول الشلاقه جبناها من وين ؟ أتاريها منك

قلت لى رقدت الراكوبه صلطه ؟ هع هع هع

[ود المطامير]

زميلي ابراهيم كان دوره في البعثات القصيرة فذهب الي هولندا ... و كتب لي من هناك يقول لي أنه قد ذهب الي مرقص (ديسكو) و في غمرة حماس رقص بريك دانص فتوقفت الصالة كلها و صاروا يتحلقون حوله و ينظرون في تعجب ... فقال لي ... علمت ليك الخواجات كيف يرقصوا البريك دانص ... و إكتشفت ليك الوهم ديل ما عارفين حاجة ... و بعد مرور شهر أرسل لي في خطاب أنه يشعر الان بخجل شديد لانه عندما كان يرقص في تلك الصاله رقصة البريك دانص كان الخواجات يتفرجون في القرد القادم من إفريقيا و الذي يؤدي في رقصة إنقرضت من العشرينيات

ههههههههههههههههه

ود الصول أحلى زول

ياخ ما تترشح لأئ شئ لأنو دا شعار سمح خلاص

لكن صاحبك دا ، الحمد لله الناس ديل مافيهم زول بعرفو

[ياسر123]

تخيل نحن كنا مجموعة زملاء ظريفين و كحيانين يعني مفلسين طبيعي بندرس في الجامعة و قاعدين في الداخلية و كان الكلام دا 1998م و كنا مفلسين جنس فليسة و اليوم كان جمعة فقلت لزملائي يا جماعة جاسفوا لي حق المواصلات امشي اجيب ليكم عمود مدنكل كدا من قرايبي عشان نفطر و نتغدا و نتعشا بيهو , يا زول المهم جاسفت حق المواصلات كان وكتها حوالي 200 جنيه ماشي و جايي , يا زول وصلت البيت و لقيت ليك قريبي قاعد عزابي و حكيت ليهو فقام و اعطاني ليك 5000 جنيه و قال لي امشي الفرن جيب عيش بالقروش دي كلها , و يا زول قمت صليت الجمعة و اتغديت معاه تمام و البطن اتنفخت و قمت شلت العمود زي الخمسة حلل و العيش في كيس و ماشي لي جماعتي و دخلت الداخلية و لم اجد في الغرفة سوا زميلي أمير و سالته اين الجماعة فقال لي كلهم شتتوا يبحثون عن فتات خبز يسدون به الرمق , فقلت له و انت مالك ما مشيت قال لي انا منتظر عمودك قلت اكيد بكون مدنكل , يا زول فتحت ليهو العمود و اديتو كيس العيش , فقال لي تعال اكل فقلت له ياخوي شبعان اكل اكلك يازول زولك بدأ بالاكل فقلت في نفسي كدا بالعمود دا ضمنا العشاء , تخيلوا يا جماعة و الله زولي دا العيشة في 3 لقم , فقلت غايتو امكن ياكل ليهو 5 عيشات و يخلي الباقي للجماعة لكن و الله يا جماعة الزول دا قام بالعيش كلو عيش بي 5000 جنيه و ما خلى ليك طبيخ و لا صلطة اسود كلها قام بيها و انا اتفرج و قال لي كدا غايتو الواحد يكون يا دوبوا اكون شبع ليهو شبعة في حياتو , فقلت له غايتو اخير اولفر توست منك غايتو بتجيب المجاعة في السودان , ربنا يديهو الصحة و العافية لكن لمن اتذكره اضحك من جواي

[ود المطامير]

تخيل نحن كنا مجموعة زملاء ظريفين و كحيانين يعني مفلسين طبيعي بندرس في الجامعة و قاعدين في الداخلية و كان الكلام دا 1998م و كنا مفلسين جنس فليسة و اليوم كان جمعة فقلت لزملائي يا جماعة جاسفوا لي حق المواصلات امشي اجيب ليكم عمود مدنكل كدا من قرايبي عشان نفطر و نتغدا و نتعشا بيهو , يا زول المهم جاسفت حق المواصلات كان وكتها حوالي 200 جنيه ماشي و جايي , يا زول وصلت البيت و لقيت ليك قريبي قاعد عزابي و حكيت ليهو فقام و اعطاني ليك 5000 جنيه و قال لي امشي الفرن جيب عيش بالقروش دي كلها , و يا زول قمت صليت الجمعة و اتغديت معاه تمام و البطن اتنفخت و قمت شلت العمود زي الخمسة حلل و العيش في كيس و ماشي لي جماعتي و دخلت الداخلية و لم اجد في الغرفة سوا زميلي أمير و سالته اين الجماعة فقال لي كلهم شتتوا يبحثون عن فتات خبز يسدون به الرمق , فقلت له و انت مالك ما مشيت قال لي انا منتظر عمودك قلت اكيد بكون مدنكل , يا زول فتحت ليهو العمود و اديتو كيس العيش , فقال لي تعال اكل فقلت له ياخوي شبعان اكل اكلك يازول زولك بدأ بالاكل فقلت في نفسي كدا بالعمود دا ضمنا العشاء , تخيلوا يا جماعة و الله زولي دا العيشة في 3 لقم , فقلت غايتو امكن ياكل ليهو 5 عيشات و يخلي الباقي للجماعة لكن و الله يا جماعة الزول دا قام بالعيش كلو عيش بي 5000 جنيه و ما خلى ليك طبيخ و لا صلطة اسود كلها قام بيها و انا اتفرج و قال لي كدا غايتو الواحد يكون يا دوبوا اكون شبع ليهو شبعة في حياتو , فقلت له غايتو اخير اولفر توست منك غايتو بتجيب المجاعة في السودان , ربنا يديهو الصحة و العافية لكن لمن اتذكره اضحك من جواي

هع هع هع هع


والله يا الحبيب أول شئ مشتاااااقين والله
وتانى شئ زولك دا ما شاء الله ردم الجن عليهو

قلت لى العيشه تلاته لقم بس بجيب خبرها ؟ هع هع هع

والله دا ذكرنى عمك محجوب فى شبابو

[mahagoub]

هع هع هع هع


والله يا الحبيب أول شئ مشتاااااقين والله
وتانى شئ زولك دا ما شاء الله ردم الجن عليهو

قلت لى العيشه تلاته لقم بس بجيب خبرها ؟ هع هع هع

والله دا ذكرنى عمك محجوب فى شبابو

الفيك بدربو
لانى ما كنت شاب
من طفل لشيخ

[mahagoub]

زمان بدون مؤآخذه
كانوا بيشيلوا الفضلات بالجرادل
وكانت شغلانيه اولاد النوبه
وكانوا مفتولى العضلات
وكانت نقطة التجمع جوار نادى الرابطه القديم
وجا اخوى ومعاهو تلاته من اصحابه
مارين بجنب الجماعه
وريحة العفنه ما تديك الدرب
وبعد ما اتعدوهم بمسافه
واحد كورك عيفونه
وقاموا جارين واخوى بيتقدل وماشى
صاحبنا سكاهم لمان ما حصلم
رجع وقبض البتقدل وجراه ناحية الجردل
وهو يبكى ويحلف انو ما قال عفنه
وبدون تفاهم غطسوا فى الجردل
وفى البيت تلاته ايام بحموا فيه والريحه قاعده