عصام محمد نور وعبقرية الكاشف

[خالد هاشم علي]

نزلت السودان عيد الأضحي من السنة الماضية وتزوجت بحمدلله ثالث ايام عيد الاضحي واحيا الحفل صديقي المبدع ( عصام محمد نور) وطبعاً انا متأكد إنو عصام حيكون صديق معظم أهل المنتدي لانه صديق لكل ناس مدني.
نرجع لموضوع الحفلة وطبعا العريس كان راسو ضارب وما عارف البغني منو وإحتمال لو سألوك في اللحظة ديك عن إسمك تأخد ليك وقفة عشان تتذكر إسمك ( والمجربين يشهدوا ). المهم كانت حفلة روعة لكن طبعا ماسمعت عصام غنا شنو ولا ماغنا شنو إلا في شريط الفيديو بعد أيام من حفلة الزواج.
وشدتني رائعة الكاشف التي تغني بها عصام في الحفلة ( سالب فؤادي) وطبعا عصام جضمها عديل كده.
وسمعتها عبر الكاسيت قبل الأخير لعصام ( روعة) وكانت حاجة روعة.
قابلت الأخ عصام في شهر رمضان بجدة ( وطبعاً باركنا له زواجه) وحدثنا كثيراً عن إلبومه الأخير ( عبقرية الكاشف) وسلمنا نسخة من الشريط وكنت متلهف جداً عشان أركب العربية واسمع الشريط.( وركبت العربية وشغلت الشريط) وماحسيت بنفسي لحدي ماوصلت البيت وبقيت قاعد أسمع وماداير انزل عشان ماأقطع الأغنية وكل مرة أقول أنزل بعد نهاية الأغنية دي وتبدأ الأغنية التانية وبرضو أقعد أسمعها ( ونسيت من فرط الإندماج إني ممكن آخد الشريط معاي فوق وأسمعو في المسجل) لكن كنت مستمخ ومافكرت في اي حاجة غير إني أسمع الشريط.
إحتوي الشريط علي الاغنيات التالية وكلها من ألحان الراحل إبراهيم الكاشف :
* الشوق والريد
*إنت عارف
*أنا ياطير
*المهرجان
*الليل مابنومو
*سالب فؤادي.
يعني إختيار أكتر من موفق لروائع الكاشف وننتظر المزيد من المبدع عصام محمد نور وبقية روائع الكاشف.
نعلم جيداً عشق عصام لأغاني الكاشف فقد تغني بها منذ ظهوره أيام الدورة المدرسية .
وعلي ذّكر الدورة المدرسية فقد تزامن ظهور المبدع عصام مع ظهور المبدع أمين عمر امين ذلك الرائع الذي لو سمعته يغني ( أرض الخير أفريقيا مكاني ) تحس إنو مافي في الدنيا دي أحسن وأرجل مننا لأننا أفارقة( ودي حقيقة).
ظهر هذا الثنائي الرائع برعاية كريمة من استاذنا الجليل والملحن الكبير والمبدع ( أستاذ/الفاضل السنوسي- استاذ التأريخ بمدرسة السني) أطال الله في عمره.
واصل عصام رحلته نحو التميز لكن إختفي المبدع امين عمر امين عن الساحة( أين هو الآن ياتري؟؟) أمنياتنا أن نسمع عنه كل خير فهو مبدع بمعني الكلمة خصوصاً في اغنيات الكاشف.وأن يجتمع هو وعصام في عمل مشترك لتخليد أعمال الرائع الكاشف.
نصيحة أخيرة ( إشتروا الشريط ).
ودمتم.....

[saleh farah]

بالفعل هى عبقرية للكاشف ومولد عبقريه لفنان الشباب الاخ الخلوق عصام محمد نور فهو بحق سيد الساحه الفنيه ولو كان زى باقى الفنانين العاملين لى روحهم شنه ورنه كان استلم الاعلام ، لكن عصام وصل رغم انف الحاقدين بمجهوده والحانه وصوته وعبقريته التى ماهى الا امتداد لعبقرية الكاشف .
ومدد يامدنى مدد

[أبوريلان]

الأخ خالد هاشم على

شكرا كتير لهذه النبذه عن الإنسان الفنان عصام محمد نور ولأ أقدر أن أزيد على كلامك الجميل عن المبدع عصام لأن الوصف يعجز ، وشكرا صالح فرح ومدد يا مدنى مدد وربنا يزرع الفرح فى قلوب الجميع كما زرعه عصام وأمين وكل مبدعين مدنى .

[ضياء الدين احمد]

حينما يكون الحديث عن الاخ الفنان عصام محمد نور ( لايوجد تعليق بعده)

[aborawan]

بعد التوزيع العالي الذي حققه شريط «عبقرية الكاشف» لعصام محمد نور ونسبة للطلب المتزايد عليه تم نفاذه من جميع محلات الكاسيت بمنطقة بحري ويقول صاحب محل شيكان انه نفد حتى من الشركة التي انتجته كما اصبح «الشوق والريد» للكاشف نفسه يحقق توزيعا مرتفعا بينما لازالت المنافسة في التوزيع مستمرة بين محمود عبدالعزيز «خوف الوجع» و«انت مافي» لجمال فرفور وبي راحتك لشبارقة كما تشاركهم في التوزيع والصدارة فرقة الصحوة ،والجدير بالذكر ان الفنان الشاب خوجلي هاشم القادم من مدينة عطبرة وتجربته الفات زمان التي تعتبر الاولى له قد حققت نجاحا كبيرا وهو صاحب اغنية الفات زمان التي تغنى بها من بعده الفنان محمود عبد العزيز هناك اقبال كبير على اغنيات كبار الفنانين امثال العاقب محمد حسن وشريطه «نجوى» وكذلك « عندي كلمة» لمحمد احمد عوض و«قصتنا» لعثمان حسين كما ان هناك اقبالاً كبيراً على اشرطة المرسال وجميلة ومستحيلة لمحمد وردي رغم انها غير جديدة .. كما يلاحظ ايضا ان هناك اقبالا كبيراً على اغاني البنات وخصوصا زهري مان «الجميل ازاني» وقسمة «العديل والزين» وعلى شريط الفنانة سميرة دنيا «كلام الناس» وندى القلعة «فهموني غلط
اما على الصعيد اشرطة الطمبور فيتصدرها شريط طارق العوض الجديد «سمرة» و«اواخر الليل» لعبد القيوم الشريف و«المرسال» لصديق احمد كذلك «خطى الايام» لمعاوية المقل وهناك قمم اشعار الطمبور «منك لله» للشاعر محمد المقل الذي يوزع توزيعا منقطع النظير رغم حداثته في الاسواق، اما علي صعيد اشرطة الربابة فلا يزال البشرى جاد السيد في مقدمتها ويليه « الناس ازونا» لمحمد خليفة و«بابور العمدة »لجلال ادريس.

اما الاشرطة العربية فمازال الشباب يرغبون الاستماع لجميع اشرطة نانسي عجرم «وقصة حبيبين» لمصطفى قمر و«بحبك انا» لهاني شاكر و«الى تلميذة » لكاظم الساهر.

نقلا عن جريدة الراي العام

[أبوبكرحامد]

عصام محمد نور مبدع حقيقى وهو امتداد لجيل العباقرة.

ويتميز عصام بالخلق القويم والأدب الجم الذى قربه لقلوب محبيه.

أذكر عند نهاية الثمانينيات وكنت وقتها رئيساً لرابطة أبناء مدنى بجامعة

الزقازيق بجمهورية مصر وكنا نعتزم إقامة حفل التخريج بمدنى وذهبت لعصام

الذى لم يتردد فى الموافقة على إحياء الحفل مجاناً تقديراً لظروف الرابطة .

ومن هنا نحيى الفنان الإنسان عصام ونتمنى له مزيداً من التفوق .

مع مودتى

ود الماذون

[rasheed]

تقدرو تقولي لي منو الما غنى ليه عصام مجاني أسأل الله أن يطول في عمره ويكفيه شر البلايا . ورغم تقصيرنا أو تقصيري معه إلا أن عصام سيظل صديقي الذي أفتقده كثيراً رغم كل شئ فهو زميل طلائع - يا ود المأذون وضياء - وهو دفعتي في المدرسة الأهلية ( أ) الثانوية العامة ( الوسطى) للناس الكبار وطبعاً للناس الصغار ما لقيتلو مثيل) ، وهو زميلي في مدني الثانوية وتفرقت بنا السبل ولكن كان لنا التلاقي في الحواته والفاشر ونيالا أثناء عملي في أوائل التسعينات وفي الخرطوم حين طلبت منه إقامة حفل زواج صديقي العزيز شاكر بخيت وعشان خاطر عين تكرم ألف عين فما كان منه إلا أن تبرع بإقامة الحفل مجاناً رغم إصراري على التعاقد فما كان منه أن رمقني بنظرة وقال لي شوف واحد تاني ما يكون بعرفك عشان تديهو قروش ،، وكان معه الرائع ياسر عبد الوهاب (سيد خليفة) فكان الحفل روعة كذلك تغني فيه العازف الرائع إسماعيل عبد الجبار عازف الكمان صاحب الصوت الرائع ،، فكم كان إنساناً ،، ففي الحواتة كان من أجل حفل خيري لعلاج إبن أحد زملائه في الفرقة وفي الفاشر ونيالا كان لحفل خيري مع صديق متولي وكم هي الحفلات الخيرية التي شارك فيها ،، وللذين لا يعرفون عصام فأن بداياته قبل الدورة المدرسية فالإنسان عصام بدأ منذ 1976 وقبلها طبعاً لكن وقتها ونحن في العاشرة من عمرنا ،، وكنا قد شاركنا في الإحتفال بعيد الإستقلال أيام نميري والذي كان الإحتفال به في كادوقلي في جنوب كردفان وقد كانت مشاركة طلائع مدني بالأوبريت أرض الجزيرة وصدح فيه عصام وأدهش جميع الفرق التي كانت مشاركة أيضاً في الإحتفال في ذلك الوقت وكانت لطلائع مدني صولتها وجولتها في ذلك الحين ولأعجاب الرئيس السابق نميري بذلك قرر مكافأتنا بمنح طلائع مدني رحلة إلى جمهورية مصر العربية وكان على ما أذكر قد تم إختيار 20 طليعي أولهم طبعاً عصام وأخرهم شخصي الضعيف وأذكر أسامة أحمد علي لاعب فريق النجوم مدني والقائمة تطول والحديث كما يقولون زي شجون ولكن أكتفي بهذا القدر ، وياليت أيام الصبا تعود وأخبرها بجمال تلك الإيام الخلود ،، مع تحياتي للإنسان عصام محمد نور وتمنياتي له بالمزيد المزيد لأنه نبع لا ينضب وكذلك مدني ولكم مني جميعاً كل التحايا والله يحفظكم وعشت يا مدني يا شعاع الشمس في بلد المليون ميل وزيادة ،،

[خالد هاشم علي]

شكرا عزيزي راشد لهذة الإضافات والحديث عن عصام يطول وزي ماقال ضياء ( يعجز اللسان) وزي ماقال أبوبكر إنو عصام مجامل للحد البعيد. وخصوصاً مع ناس مدني وحتي بعد أن إستقر هو وأسرته بالخرطوم فهو يفخر دائما بأنه من مدني . لأنو مدني مفخرة ودي مادايرة كلام.