عفـوا زوجتي الحـبيبة

[صالح ابوشوارب]

الاخوة الأعزاء سوف انقل لكم مشهدين من مشاهد الحياة الزوجية و أتمنى التعليق الصريح يعني مش ضروري يكون مثل زميلك الذي سبقك
وهذا هو المشهد الأول
كنت اعمل في إحدى الشركات مع صديق لبناني وفي أحد الأيام حضر للمكتب الساعة التاسعة صباحا وبعد نصف ساعة اتصلت به زوجته من المنزل وكان هذا الحوار أمامي
حافظ : ـ مرحبا حبيبتي كيف أصبحت والله مشتاق ليك أمريني محتاجة حاجة
( وأنا بسمع الكلام و أقول في نفسي أكيد الراجل دا بيستهبل علي زوجته . قبل نصف ساعة كان معاها ايه حكاية حبيبتي ومشتاق ليك وكلام البكش وقدامي كمان دا مابيخجل ؟ )
زوجة حافظ : أبدا حبيبي بس قلت اطمئن عليك هل وصلت العمل بخير
اما المشهد الثاني
في تمام الساعة الواحدة ظهرا ونحن في الدوام رن تلفوني وكانت زوجتي في الخط أرجو أن تسمعوا الحوار
صالح : ـ منو ؟
زوجتي :ـ انا ام شوارب
صالح :ـ عايزه إيه . ما كنت الصباح معاك ، انتو ما عندكم شغلة
زوجتي :ـ أنا ضربت ليك عشان تجيب لينا العيش
خلاص أنا جاي وقفلت السماعة (( مشهد قبيح ))
والسؤال : ليه الجفا وليه ما نعطي الكلمة الحلوة هل حافظ بيستهبل هل نحن صادقين في مشاعرنا وليه بنخجل نقول لحبايبنا وزوجاتنا أمام الناس يا حبيبتي ويا عيني ومشتاق ليك هل نحن بخلاء و أرجو أن لا تكونوا بخلاء برأيكم النساء والرجال هل ممكن نكون ذي حافظ وزوجته هل ممكن تقول الزوجة لزوجها يا حبيبي أمام النساء والرجال هل تربيتنا كانت سيئة ؟ ام هذه هي التربية الصحيحة والواحد لازم يكون حمش ؟

[أبوريلان]

أبو شوارب

مساء الفل ياسيد الكل

أنت بدأت تهبش فى الوتر الحساس ، بس ردى سوف يكون خاص .

ولك الشكر لهذا التناول المنعش .

[shashi]

تحياتي واحترامي ليك يا ابو شوارب
دائما مواضيعك حساسة وبتلعبها باكورد في التمنيات .. ما عارف حقيقة نحن طبعنا حار شوية وفي بعض الاحيان في اشياء لا تمس حموشية الرجل ولا الكرامة بقدر ما انها ترفع من الروح المعنوية وتجدد في العلاقات .. وانا دائما في بالي هذه المقارنة لماذا الناس الآخرين عندهم لين المعاملة والعشرة السمحة .. وعاشروهن بالمعروف ونحن لا .. لا استثني النساء فايضا السودانيات معاملتهم جافة .. ودائما بضرب مثل لزوجتي بنساء جيراننا بالحدود المصريين اقول ليها المصرية بتهتم بزوجها أكثر من السودانية .. في الصباح تودعه الى الباب وتقول له بالسلامة اما السودانية هي راقدة ومتكأة على جنب وتقول لك مع السلامة لا حظوا الفرق بين العبارتين ( بالسلامة يعني تمشي وترجع بالسلامة يا حبيبي ) اما ( مع السلامة ) ففي ستين دهية وعساك ما عدت .. يا اخي ده واقعنا وابو شوارب دائما يخت يده في جرح نازف بس العلاج شنو انا شايف انه حدة طبعنا وخشونة المعاملة يرجع لحرارة الجو عندنا فاصبحنا حارين في كل شيئ .. لا حظ في الكمراة الخفية الناس التانية بتقابلة النكتة والموقف بكل برود وتتفاعل معاه للنهاية اما نحن السودانيين اذا جابونا في الكمرا الخفية تنتهي الحكاية دائما بقطع المنظر لان الحكاية بيكون حصل فيها بكس ولا شلوت مافي مفر والله يكون في عوننا مع تحيات ابو شوارب لكن انا بشوف تدليل المرأة لزوجها والعكس شيئ جميل ويرطب الجو العائلي ان شاء الله اولادنا يصبح عنده حنكة احسن مننا وما يكون ردودهم لبعض زي البنية ..
مع تحياتي ابو احمد
[IMG]C:\Documents and Settings\Administrator\My Documents\My Pictures[/IMG]

[صالح ابوشوارب]

.
الاخ ابو ريلان

اولا شكرا لمرورك

و لك التحية لفتح الباب ونحن في انتظار الرد

ابو شوارب
.
--------------------------------------------------------------------------------------

الاخ shashi

لك التحية والاحترام

انا مسرور لتفاعلك مع الموضوع

وهذه هي المناقشة التي يمكن ان تؤثر فينا ونبدأ نغير الجفاوة ونبدأ بالكلام الحلو

انا وضعت نفسي في الصورة عشان الناس ماتخجل واتمني ان تتفاعل

ابو شوارب

.

[ابو المهتــدي]

بسم الله الرحمن الرحيم
الخوة الكرام اسعد الله ايامكم وعشرتكم مع من هن بينكم مودة ورحمة
احبتي لا تاخذوا الامر بهذا الجفاء او كما ترون جفاء في للفظ 0 ام المعاني والعشرة الحقة فعندهن اكبر من تلك الاقوال 0 الفعل لديهن يفوق كل تلك الاتي تاتين بمعسول الكلام 0 واذا جعلنا هناك مقارنة تجد الشقائق من بلدنا 0اكثرهن معرفة وحنقة في المظهر والتدبر الفعلي لحق الزوج 0
ومن ضبع الحياء عندنا اشهار تلك الكلمات علي الملاء مما يجعلها عرضة لنقدها في حيائها وهذا ما لا يقر عندنا .0 ولكن انظر لها كيف تسرك عندما تجدها في لحظة البسمة 0 وساعة الرضاء0 وعند الشدائد0 والملمات 00وحق الابناء0 والمنزل 0 انها بحق هي الاولي وبدون تحيز 0
وحتي نحن الرجال يسبقنا ادب الحياء في بعثرت تلك الكلمات علي الملاء وكثير منا تزجرة نفسة عفة في ذلك 0 وما اكثرنا شفقة وحب فعلي للشقائق
سوي القلة التي تغلظ القول والفعل 0
رقم ان هناك بعض الشي من التقاليد دخلت علينا 0من منكم سمع امة او جدتة تنادي اباه او جده باسمة 0 لان ضبع الحياء رفع الصوت لديهن شي يكشف
عن مخزون تلك الافة والله اعلم ونتمني ان تكون هناك مداخلة من بعض الاخوات المتزوجات 0 لمعرفة الراي الاخر ولكم تحية0

[صالح ابوشوارب]

.
شكرا ابو المهتدي

ان كلمة احبك هي مفتاح القلب وبذرة السعادة

فعن رسول الله (ص) : ( قول الرجل للمرأة إني أحبك لا يذهب من قلبها أبداً ) .

فاذا خجلنا فستحول العلاقة الزوجية الي علاقة ميكانيكية جوفاء

والله اعلم

اخوك ابوشوارب

[ابو المهتــدي]

بسم الله الرحمن الرحيم
الاخ العزيز ابو شوارب
ليس القصد هو ازاحت او عدم وجود تلك الكلمات في تعاملنا بل هي موجودة ومعاشة اكثر من الذين يبعثرونها 0ونما تناولنا لها يختلف عن الاخرين بحكم الطبع 0 ففي وقتها ومكانها تجدها اكثر منهم 0 وليس علي الملاء 0
هل رايت اسرة سودانية كبارها يقبلون بعضهم في ملاء 0
صدقني لقاء العيون 0 ودف الايدي 0لهو اكثر مما ينثرون 0 وهذا حياء طبعنا
وكل شي 0في وقتة وزمانة 0 اعمق والله اعلم 0

[ياسر فقيري]

أخي أبو شوارب لك التحية .. وبم أنك فتحت موضوعاً جميلاً نرجو أن نسمع رأي أخواتنا في المنتدى رأيهم في ذلك .. مع وعد مني بكتابة رأي حول هذا الجانب في سانحة أخرى .. ولك التجلة والاحترام

[ابراهيم]

لقد اصبت يا ابا شوارب ... فموضوعك حساس ... له اهميته القصوي ...

فنحن السودانيين بحكم تربيتنا اتربينا على كبت مشاعر الحب ، الحزن والكراهية احياناً ،وعدم التعبير عنها بالكلمات ربما عبرنا عنها بطرق أخرى واعتقد انها ليست مشكلة.

اما حافظ وزوجته فهذه تربيتهم ترعرعوا ونشأوا عليها .. وكل يعبر عنه لزوجته او حبها لزوجتها حسب طبيعته مع الاخذ بأن هذه الكلمات مهمة ولكن لا احبذها امام النساء والرجال وتربينا سليمة 100% .

احييكم على هذا الاطراء
وهذه وجهة نظري ولكم التحية

[صالح ابوشوارب]

.

اخواني الاعزاء

ابو المهتدي

ابراهومة

لكم حبي وتقديري

تعقيبكم علي الموضوع بهذه التفاصيل يدل علي اهتمامكم الاسري

وهذا يبعث السرور في النفوس وانا متاكد التعبير عن الحب والاهتمام

ممكن يكون بعدة طرق لكـــــــــــــــــــــــــــــــــــــــــــــــن

ايــــــــــــــــــــــه المانع عندما تدخل الشقة او البيت تقول ليها

مساء الخير حبيبتي

يا ابراهومة في الضرا ( وجهة نظر )

------------------------
ابو شوارب

--------------------------------------------------------------------------------

الاخ ياسر فقيري

شكرا لك علي الاهتمام بمثل هذه المواضيع

ومنتظر منك الكثير

وانا كذلك في انتظار النصف الاخر

----------------
ابو شوارب

[بابكر]

الاخ الوفى ابو شوارب000لك التحيه والتقدير واشكرك جدا لهذا الموضوع الذى ارجو ان يفطن له كل الشباب المتزوجين والمقدمين على الزواج اقول 000 بكل اخلاص وصدق,, احبوا زوجاتكم تسعدوا 00000 قل لزوجتك احبك ولاتخجل00 قلها امام ابنائك وبناتك 000وتأكد انك بذلك تدخل الطمأنينه فى قلوبهم00 ويحسوا بالامان,, وقلها وسوف تجد زوجتك تحبك وتسهر عليك وتسعى لرضاك ,, اهتم بها حسسها بأنها كل شىء فى حياتك وسوف ترى 0000000000000000 والله ثم والله لم يفتر حبى لزوجتى00 ولم يتغير00 منذ ان تزوجتها والى الآن,,, وهذا فضل من الله ونعمه00 احمد الله عليها كثيرا ,,, فهى حبيبتى وصديقتى وام اولادى التى اكن لها من الاحترام والحب الذى يكبر ويزداد مع الايام ,, فهى الواحه التى الجأ اليها عندما اكون متعبا 00 فتدخل البهجة فى نفسى ,, وهى سكنى ومستودع اسرارى 00 وهى التى تتألم لالمى,, وتفرح لفرحى 00 انها حبى الكبير00 وستبقى ان شاء الله مابقينا على الحياة 000

[صالح ابوشوارب]

.

والله انت عسل يابكور

واشكرك وكل يوم تكبر في نظري

فعلا هي الحبيبة وهي الزوجة وهي كل شئ

بالله الواحد اذا قال لزوجته ياحبيبتي امام الاولاد او امام كل الناس

ايه المشكلة او ايه العيب

لك حبي وتقديري
------------------------

ابو شوارب

[ابراهيم]

والله مافى عيب في الموضوع وبالعكس دا الكلام الصاح

والتربية القويمة لكن زي ما قالوا فاقد الشيء لا يعطيه

يعني أغلبية السودانيين اتربو على كبت المشاعر الجميلة

وعدم البوح بيها ولكن اعتقد حسي المفاهيم بدت تكبر

انا غايتو ما بعرف اكبت مشاعري تجاه انسان بغض النظر عن نوع المشاعر

ولك الود

[خالد هاشم علي]

عزيزي صالح....
الموضوع حلو وأكتر من حلو.
عن تجربتي الشخصية فقد تزوجت منذ عام وعن قصة حب لمدة (17سنة) شوف بالله ( رأيكم شنو) وأقولها للجميع أنني احب زوجتي وأدلعها وكل يوم لازم توصلني لغاية خشم الباب. وأول ماأدخل المفتاح في الباب ( لمن أرجع ) تلاقيني من جوة بكل بشاشة وترحاب. وطبعا ياجماعة كل واحد عنده طريقته في التعبير. يعني في اللي بيعبر بالكلام وفي اللي بيعبر بالهدايا ( وطبعا دي حاجة مهمة عند النسوان) وفي البيعبر بالإبتسامة والضحكة بس الواحد لازم يوصل الجواهو . يعني ماتوصل غضبك وبس لازم توصل فرحك ورضاك عنها وبالمناسبة وعن تجربة الزوجات زي الأطفال وفي غاية البساطة ( يعني كلمة توديهم وكلمة تجيبهم ) وبالمناسبة الحياة الزوجية فيها المشاكل وفيها العواصف والزوابع الرعدية ( يعني ماكلها عسل ) بس لازم تتصرف بحنكة عشان ترجع لجو الصفاء والهدوء والسكينة.
احكي ليكم الحكاية دي وحصلت لي قبل الزواج:
كنت راكب مع صديق لي وزوجته وقفنا بالإشارة ووقفت جنبنا سيارة فيها راجل وإمرأة وقاعدين يتونسوا ويضحكوا بي مزااااااااج. قام صاحبي قال لي ( والله المراة الجنبه دي مازوجته) قلت ليهو ليه؟؟؟؟ قال لي ( في زول بيضحك مع زوجته كده) شوف بالله جنس التخلف ده. طيب ليه ماتضحك مع زوجتك وتهظر معاها وتلعب معاها كوتشينة وليدو؟؟؟؟؟ .
أحبتي....
أسعدوا زوجاتكم بالكلمة الطيبة والمعاملة الحلوة والحكاية ما معركة لازم يكسبها واحد من الطرفين ( طلعوها درون) وماناخد الحكاية tobee or not tobee ياخي إعتبرها واحد صاحبك ولا أخوك وتعالوا نسيب الجفوة ونقول الجوانا. وزي مابنطلع غضبنا وعدم رضانا فيهم ياريت نطلع فرحن ورضانا عنهم . وبرضو نحن الكسبانييين ( الكام ليك ياضياء الدين ودي روشته مجانية من ناس خبرة لأنك علي وش زواج ).

ودمتم....

[al zeer]

السلام عليكم
لكم التحيه
و كلامك عجيب يا خالد ( جميل ) و الله اديك العافيه


تقريبا نفس المشكله فى كلمة بابا و ماما ......... ولا شايفين شنو

ممكن تخش فى نفس الموضوع (كلمة جبيبتى) و باب الربط انو الواحد ما بتلفظ بيها من باب الخجل

الزول الحمش فى راى البخاف على اولادوا من نسمه الهوا الطاير مش انو البحترمها و بقول ليها حبيبتى

[waheeb]

لك الشكر أخي ابو الشوارب ...

أحي والله هذا موضوع في غاية الاهميه لان التعامل بين الازواج لا بد ان يأخذ سمه معينه يسودها

الحب والالفه.. ولسنا بأحسن من سيدنا رسول الله صلي الله عليه وسلم فقد كان خير من يعامل

زوجاته كان يهتم بهن ويرعاهن حق الرعايه.. هنالك اشياء تغرس فينا منذ الصغر اوعي تعمل ليها

كدا وكدا عشان ما تتسيطر عليك.. أقول ليس هنالك عيب في ان يساعد الرجل زوجته وأن يرعاها

لانه اصبح الانسان الوحيد المسؤول عنها.. مثلا اذا رأيتها لابسه لبسه حلوه تقول ليها ياسلام علي

ذوقك او تثني علي تسريحتها .. وعندما تعد لك الطعام تقول ليها تسلم ايدك كي تحسسها بان تعبها لم

يضع هدرا لا تقول دا أكل شنو دا ودا فستان شنو الانتي لابساهو دا كدا ممكن تعمل ليك اي شئ تريده

لكن بدون رغبه أكيده في ذلك.. لا بد من ان تسمعها الكلمه الطيبه وانت تحضر لها الهدايا ولو البسيطه


أكيد دا بيدخل السرور في قلبها وبجعلها تهتم أكتر وأكتر بيك.

[صالح ابوشوارب]

.
الاخ ابراهيم

شكرا لك لانك سحبت الموضوع للواجه

وجميل الواحد مايكبت مشاعره لكي تتجدد

الحياة الزوجية و و و و و و و

وبقية الاخوان انتظروا الرد

----------------------------
ابو شوارب

[ام قبس]

نحنا بخيلين في كل شيء ياعم صالح بخيلين في كل شيء
بخيلين حتي علي انفسنا
ربنا يشفيك ويرفعك ويحفظك لينا يارب

[أبوريلان]

وأم محمد ردت الجميل بأكثر وهاهي لاتفارق عينها الدموع لمرض زوجها
أصبح بيتها غرفة بمستشفي دلة بالرياض تنوم وتقوم ، تقابل الزائرين
وتودعهم ببشاشتها وكرمها الفياض حتي داخل المستشفي ، تراقب
زوجها وتطلب له العلاج في أوقاته وترعاه وهو علي فراش
المرض ، تشجعه وترفع من روحه المعنوية ، فارقت النوم
لتسهر لراحته ، ربنا يديك الصحة والعافية يا أم محمد
أما نينا أن تعود الصحته والعافية لأبوشوارب
لتعود لكم البسمة .

أم قبس جزاك الله خيراً لهذا التنقيب عن الكنوز .

[النويري]

لك التحية أم قبس على رفع هذا البوست فالعم صالح أبو شوارب يستحق منا الكثير والكثير ربنا يديه الصحة والعافية ويعود كما كان وأحسن

اللهم أشفه اللهم أشفه شفاء لا سقم بعده

[ودسمير]

جد يا اخى ابو شوارب كلامك كارب ..
الشعب السودانى تربى فى كثير من الاحيان على العنف والضرب وكيل الشتائم من الاباء والامهات حتى الاقارب ما قصرو !مما جعل القسوة لها مكان فى حياتنا وبدورها اثرت سلبا على حياتنا خاصة الزوجيه !
الحب والكلام الجميل والرومانسى موجود بدواخلنا بس كيفن (نمرقو) ؟!! والغريبه ان القنوات الفضائيه ما قصرت معان فهى تعطينا دروس رومانسيه يوميا وبالمجان .
اتمنى ان نخلع (وش النحاس) شويه ونحاول نتعود على الكلام العاطفى مع ان الموضوع صعب وصعب جدا بس نحاول وأكيد ح ننجح لو ما انحنا ح يكون اولادنا فى المستقبل

وحتما سنلتقى