قصه البيت المسكون (بوست من ارشيفي )

[الشمشار]

سلام مطبوق
والله مشتاقين شديد
انا عارف الشمار حارقكم
عنوان البوست نااااري هههههههه

قبل خمسه ايام تقريبا اتصل علي احد اصدقائي
هو
سلام ياشاب
انا
اهلا ياباشا
هو
اسمع لسه في هواياتك الغريبه ديك
انا ضاحكا
وهي بتتخلي
هو
عندي ليك مفاجاه
انا
مفاجاه عدييييييل كده
هو
ايوه
انا
خير انشاء الله
هو
انا مسافر .......(معليش المكان مابقدر اكتبه ) تمشي معاي
انا
في شنو هناك ؟؟؟؟
هو
بيت مسكون واسيادو قرايبي ووادي ليهم شيخ يقرا في البيت قران
انا
كان ما جيت سقتني معاك بجي بالمواصلات
هو جدا ياباشا انا بجيك بعد نص ساعه جهز نفسك
بيني وبينكم سرحت وخفت في نفس الوقت وطوالي جهزت نفسي وبعد ساعه جاني صاحبي هههههههههههه مواعيد سودانيين
وركبنا العربيه في الا ول غشينا الشيخ المقرئ وسقناهو معانا الطريق رغم انو طويل لكن المشوار كان جميل
والعربيه ماشه اخوكم بقي يسرح
بيت مسكون ؟؟؟
سكننو شنو ؟؟
شيطاين
جن
شنو بالضبط
الناس اسياد البيت عايشين فيهو ولا ساكنين في مكان تاني
مجموعه اسئله كانت تدور في خاطري ونحن زي مابقولو ناس الروايات ذاهبين الي المجهول
يتبع

[الشمشار]

وقفنا جنب بيت عادي بيني وبينكم انا قلت ده حيكون البيت المسكون طوالي سالت صاحبي
ده ياهو البيت
قال لي لا ده البيت بتاع سيد البيت المسكون مؤجر والبيت المسكون ملكو لكن خلاهو عشان مسكون واجر هنا
طرقنا الباب فتح الباب شاب تقريبا كده عمرو 35 سنه بعد سلمنا عليهو قال اتفضلو ودخلنا ساله صاحبي عمي فلان وين ؟؟؟
قال لي
مشي قريب هنا وبجي راجع هسي
بعد لحظات اتي حاج فلان سلم علينا وصاحبي عرفو بي وبالشيخ
حسيت انو اتضايق اني موجود وعيونه كان فيها سؤال
عرفنا ده الشيخ كمان ده في شنو جاي؟؟؟
المهم بدا يحكي للشيخ
طبعا انا اشتريت القطعه الفيها البيت دي قبل 18 سنه كانت كوشه وبنيت البيت وبما اني كنت في السعوديه ومعاي الاسره البيت كان فاضي لحدي ما انا جيت قبل سنه تقريبا وجيت نهائي عشان استقر في بيتي الطلعت بي من الدنيا
لكن (قالها وبكل المراره )
البيت ده مسكون
الشيخ قال لي
عرفتو مسكون كيف احكي لي
حاج فلان
شوف ياسيدنا الشيخ اول يوم انا خشيت في البيت ده جاتني قشعريره كده
انا
عمنا هو البيت ده كان مقفول كم سنه بالضبط ؟؟
تجاهل سؤالي
كررت السؤال
اجاب بامتعاض تقريبا 15 او16 سنه كده
سالته تاني انا ما لحوح
طيب اذا انت قلت اشتريتو قطعه من قبل 18 سنه وهسي مضي علي تشييده 15 او 16 سنه معناها في سنتين مفقودات هنا هل البيت بنيتو في سنتين ؟؟؟
لالا ياولدي انا بعد اشتريتو قعدت زي سنه ونص كده وبعد داك بنيتو
طيب عرفت انو مسكون كيف بس القشعريره الحسيت بيها طوالي قمت قلت البيت مسكون
لالا حصلت حاجات كتيره
اولا كان في حرايق بتقوم في البيت براها
بعدين سلك الفيوز بضرب براهو نحن قلنا يمكن من توصيلات الكهرباء بعدين اي حاجه نختها في البيت في مكان معين نلقاها في مكان تاني
بعدين بسم الله الرحمن الرحيم اللهم احفظنا بنشوف خيالات كده غريبه وحيوانات اشكاله غريبه كده

حا اواصل الصبر جااااااااي

[الشمشار]

هنا تحدث الشيخ
انتو قبل تخشو البيت عطرتو البيت وقريتو في قران ولا ماقريتو ؟؟؟
الحاج ابدا والله ياسيدنا الشيخ
انا الشمار كتلني طوالي قلت لي كمل ياعمنا
اها بعد داك عندي ولدي الفتح ليكم الباب ده عندو زوجتو اجهضت خمسه مرات ولما بنوديها الدكاتره بقولو مافي اي سبب للاجهاض يعني لاوقعت ولا في اسباب طبيه وهم زاتهم استغربو من القصه دي
انا
طيب ياعمنا انت ماقلت ليك سنه مستقر هنا واعذرني علي السؤال زوجه ابنك دي حملت خمسه مرات في السنه ولا كيف ؟؟؟
اجابني ضاحكا
لا ياولدي ولدي متزوج ليهو اربعه سنه وقعد في البيت المسكون ده زاتو المده دي كلها وانا وام العيال واخوانه الصغار كنا هناك في السعوديه
الشيخ وجه سؤاله للابن
انت ياولدي بالضبط كده شفت شنو ؟؟؟
الابن والله ياشيخنا حاجات كتيره كانت بتحصل اول ايام زوجتي كانت بتقول لي حصل كذا وكذا انا ماكنت بصدقه وبقول ليها دي تهيات لحدي مافي يوم وانا ماشي الحمام بالليل لقيت لمبه الحمام مولعه استغربت لانو انا وزوجتي بس الفي البيت وهي بتستعمل الحمام الداخلي برضو ما ختيت في قلبي حاجه وقلت يمكن نسيتو انا فاتح
وبعد طلعت من الحمام قفلت كل اللمبات والمواسير زي ما بعمل طوالي قبل انوم ومن ضمن الحاجات الانا قفلتها انبوبه الغاز في المطبخ وبلف الصهريج
ومشيت نمت قريب الصبح كده جاي علي الحمام وداير اتوضا القي ليك اللمبه مولعه والصهريج ملا والمويه كابه في البيت جريت علي المطبخ لقيت البوتجاز مولع
(بيني وبينكم انا حسيت انو زي البكذب كده )
هنا الشيخ طوالي قال ليهم ممكن نمشي نشوف البيت
الحاج قال لي جدا لكن اعذرنا نحن بنوديك البيت لكن مابنخش معاك
الشيخ قال ليهم خير بس ادوني النتوضا


حاواصل ليكم بعد شويه

[الشمشار]

مشينا البيت
البيت تشوفو من بعيد لازم تقول ماشاء الله حاجه روعه رغم انو في مدينه ولائيه ما في العاصمه
المهم وقفنا قدام البيت
ودخل الشيخ وطلع بعد اكتر من ساعتين وقال لينا خشو
خشينا
البيت جميل من الداخل وينبئ عن ذوق رفيع في اختيار الالوان والديكور رغم انو الغبار طمس حاجات كتيره
الشيخ قال لينا اتوضو في الماسوره دي
اتوضينا ومسكنا الكتب هو يقرا ونحن نقرا وراهو لحدي ماقرينا سوره البقره وال عمران كلهم
قال لينا الشيخ ما تخافو انا طلعت الجن من البيت والفتره بتاعه الساعتين القعدتها دي كانت كافيه لكن مرات ولا اسبوعين ما بتكون كافيه والحمد لله ده جن نصراني
هنا سالته يعني شنو جن نصراني هم كمان في جن نصراني وجن يهودي
ضحك وقال لي في جن نصراني وفي جن مسلم لكن يهودي دي ما سمعتها الا عندك
نسيت اقول ليكم انو نحن كنا بنرجف من الخوف لكن سبحان الله بعد اتوضينا وقرينا القران الخوفه راحت
القصه لحدي هنا انتهت لانو مافي جديد غير انو في اليوم التاني برضو الشيخ مشي البيت المسكون براهو وقرا تاني لكن في الا خر اليكم الروشته التاليه من الشيخ
لابد من قراءه القران في المنزل يوميا حتي تحفظه
لابد ان تحفظ نفسك كل يوم من خلال الايات والادعيه الماثوره
في الختام ياجماعه الله يكفيكم شر الجن وابشركم اني اتفقت مع الشيخ اني احضر جلسه لاخراج الجن من الانسان واول ما احضرها بجي احكي ليكم
عذرا لم استطع كتابه اسم صاحب المنزل المسكون ولا مكان سكنه ولاحتي اسم الشيخ
لاني لم استاذنهم في في سرد القصه
دمتم بخير وفي امان الله

[بت أم درمان]

لكن في الا خر اليكم الروشته التاليه من الشيخ
لابد من قراءه القران في المنزل يوميا حتي تحفظه
لابد ان تحفظ نفسك كل يوم من خلال الايات والادعيه الماثوره

شكرا كثيرا على النصيحة المهمة دي وفعلا قراءة القران والاذكار تحفظ الانسان والبيت
ولو ما قرات لابأس من تشغل شريط او اذاعة القران الكريم فهي مفيدة لك وللبيت


في الختام ياجماعه الله يكفيكم شر الجن وابشركم اني اتفقت مع الشيخ اني احضر جلسه لاخراج الجن من الانسان واول ما احضرها بجي احكي ليكم

امين واياك ان شاءالله
منتظرين الحلقة الجاية بعد الجلسة
ما تطول

عذرا لم استطع كتابه اسم صاحب المنزل المسكون ولا مكان سكنه ولاحتي اسم الشيخ
لاني لم استاذنهم في في سرد القصه
دمتم بخير وفي امان الله

لايهم كتابة اسم صاحب البيت
بس ورينا وين مكان البيت هههههه

[الشمشار]

لايهم كتابة اسم صاحب البيت
بس ورينا وين مكان البيت هههههه

تسلمي القصه مضي عليها اكتر من ثلاثه اعوام المنزل في مدينه كوستي

[بت أم درمان]

تسلمي القصه مضي عليها اكتر من ثلاثه اعوام المنزل في مدينه كوستي

الله يسلمك خلاص طالما كدا يلا ورينا اسم الزول صاحب البيت واسم ولده واسم الشيخ واسم صاحبك الضرب ليك

[الشمشار]

الله يسلمك خلاص طالما كدا يلا ورينا اسم الزول صاحب البيت واسم ولده واسم الشيخ واسم صاحبك الضرب ليك

لالالالالالالا