عبده البطيني

[الشمشار]

سلام من الله عليكم وشكرا لي اي زول رد لي في اي بوست وانا ماعقبت علي لانو والله اخوكم مشغول الايام الفاتت والمنتدي مابخش كتير بقيت زي ماعارفين شغلنا بياخد الزمن ومابفضل شئ وحاجات كثيره بس خلوها ساي وليكم العتبي حتي ترضو ونخش في قصتنا
عبده ود امنه ههههههه عرف بهذا الاسم لانو ناس حلتهم من قامو لقوهو متابع امو محل ماتمشي وماشاء الله امو مامقصره شئ سمايات وشئ اعراس وشئ بكيات وهو معلق في طرف توبه ومن هو صغير اتعود علي اكل السمايات واصبح خبير في الاكلات والكرتات ذاتو وعشان انا متاكد انو في معانا حناكيش هههه حا افسر كلمتي بطيني وكرته فكلمه بطيني تعني الشخص الذي تسيره بطنه وهي كلمه تطلق ايضا للشخص الذي يكون اكولا مثل اشعب الاكول اما كلمه كرته وجمعها كرتات فتعني بقايا الطعام
كدي ارحكم نخش توش في قصه عبده البطيني

[الشمشار]

اولا بالتبادي خلوني النوصف ليكم شكل عبده البطيني فهو في العاشره من عمره من اصحاب الوزن الثقيل وعلي راي عادل امام عريض المنكعين (المنكبين ) كرشتو قدر كوره السله وصاحب صوت عالي جدا عندما يبكي يعني كان جعر الا تشوف ليك بلد ياعم محجوب ورغم انو جنو مناسبات زي امو لكن مابحبذ اللمه وخاصه في الاكل ونخرينو ممطره طول العام ولايكلف نفسه عناء لتنظيفها وطبعا صوته لين وكلامو كلو نسواني
في واحده من المناسبات ساقتو امو وطبعا زي ماقلت ليكم هو خبير في الرمرمه والزاد وغطي انو امو خبيره في الطبخ ومتخصصه في الضلع والمناسبه ياجماعه كانت كبيره اها امو استلمت الضلع وهو استلم لي بنبر جنبها زي كلب الجزاره وامو تهضرب مع جاراتها فلانه طلقوها فلانه دايره فلان فلانه قربت تلد (انت لو داير اخبار حلتنا جيب عبده البطيني وادي اي حاجه ياكله وهو بتش ليك شمارات الحله نفر نفر )
اها صاحبنا مصاقر الصاج وعيونه مارفعه من الصاج واللحمه قربت تنجض وصاحبنا بطنو بقت تجوغر
نواصل بعد الفاصل

[الشمشار]

تركنا اللحم ينجض وعبده بطنو تجوغر
امنه
عبده ياولدي ماتمرق بره خليك هنا انا ماشيه اصلي وجايه
عبده
كويس
انتهز عبده فرصه خروج امه وقبل ليك علي الصاج بعد امو نزلتو من النار ورغم انو الضلع مسخن عبده ماخبير دور ليك اكل وبقي شغال بي يدينو الاثنين
نترك عبده قليلا ففي بيت المناسبه كان الجميع متجمعين في الخارج ناس الحله قرايب ناس المناسبه وبعض الضهب وحاج الامين الذي عرف بكثره تنظيره في الحله شابك ليك الشباب
الصيوان ده اعملو ثلاثه غرف ياحسن مليت البراميل جدو جيب الاباريق املاهن يا جماعه هوووي واحد يمشي علي النسوان ديل يجيب لي قهوه
امتعض الشباب من نقه وتنظير حاج الامين الا انهم مجبورين يستحملو وقالو البتجي من السماء بتحمله الواطه المهم الامور مشت كويس لحدي حوالي الساعه 2 عندما سمعنا جميعا صرخه عاليه قادمه من بيت المناسبه وطوالي مشينا نشوف الحاصل لقينا ليك صاحبنا عبده البطيني راقد ممدد في الواطه ومقلع عيونو وفي يده قطعه لحمه كبيره وامو تكورك وووووووب علي الليله ما بيحيا صاحبنا عبده دور في الضلع داك شبع فيهو شبع ووصل مرحله من الشبع ماقادر يتحرك والناس انقسمت واحدين جايطين عبده كيف ياكل الضلع والنسوان الغبيانات ديل كانو وين وواحدين قالو لازم نسعفو وعبده يصيح امي يمه انا اتنفس كيف ؟
وامه تسكلب بعد شويه عبده اغمي عليهو والناس جاطت شالوه وودوه المستشفي عملو لي غسيل معده اظنو اخد 4 ساعات والمناسبه طبعا طرشقت الناس كلها راجين عبده الجن ده بعد جا مارق النسوان بقن يزغردن والرجال يكبرو والشباب يصفرو رغم انه غير محبوب لكن ماعرفت السبب الفرح الناس كده
حاجه امنه
عبده ياولدي انت كويس
هنا انفجر عبده باكيا
امه
مالك ياولدي في شئ بوجعك
عبده
لا
امه
خايف
عبده
لا
امه
طيب مالك ياولدي
عبده
ليه طلعتو الضلع من بطني يمه انا جعاااااااااااااااااااااان
انتهت

[نزار احمد كوارتي]

ههههههههههههههههههه

قصتك دي زكرتني ود جيرانكم الخشا جوه التلاجه داك

[خالد علونى]

أمثال عبدو في المجتمعات كتيرة


وربما يندرق تلقي مجتمع ما فيهو الشخصية دي








مشاققة:


مشتاقين والله وما تطول الغيبة تاني

[mahagoub]

البطينه ده ما مشكله براهو
زى ده يفكوه جنب الكرته

[mahagoub]

عندى واحد بعرفوا
يكون قاعد يختوا الوجبه يقول انا ماكل
يقعدوا الجماعه يحنسوه
دخل ايدك معانا قزقز ساى
يقوم آخر واحد من الاكل

[بت أم درمان]

عبده
ليه طلعتو الضلع من بطني يمه انا جعاااااااااااااااااااااان

ههههههههههه والله جد خسارة فادحة دي
يعني بعد ما خرب مناسبة الناس
اجو اطلعوا اللحم من بطنو
لا استفاد هو لا استفادوا ناس المناسبة باللحم ههههه

[عنكوليب]

وجع ال ........

عليييك الله شوفوا الشافع ده يا وليدات أمي ؟
حير الناس في الضلع ؟

تاكل ال ..... حق المساكين ؟؟؟؟