اللّهــم اغفر لها وأرحمها
مرور عام على وفاة الوالده
( خربشات الحـــــــــــــــزن )
ابكيك كيف ... وبي ياتو حس
بدل الدموع ابكيك رعاف
وانثر بذور حزني لي شفق المغيب
ارويها بي دمى الزعاف
تطلع هناك شجرة حزن
مكسية بي حمرة وجفاف
تشتاق حنانك والضفاف
ابكيك كيف ...
ابكيك وجع
قاعد محكر في القلب
رافض يفارق سكتو
والشوق يسافر مني ليك ..
اهديك سلام
يا والده يا نبع الحنان
اهديهو ليك شايل جرحات الاسى
قاطع مسافات الزمان
اهديك سلام شايلو النسيم
والطيف كمان هجر المكان
مشتاق يجيك من غربتو
دايرلو زول يدي الامان
مسكين وليدك من زمن فقد الامان
ماليهو حزنا ما بفوت
شبع القلب منو اتملا
دمعاتو سالت في الخدود
زي زول غريب هجر الاهل
فقد الديار ساب الوجود
لا ليهو حس لا دندنة
سكنو الحزن ما دار يفوت
ما اصلوا من اول وساس
يا والده ولدك فى الحزن عاش السنين
في عيونو فاض الشوق اسى
مسكين يفتش للحنين
عاش السنين مسكين يكابد فى الانين
يا والده برضو على العلى
ولدك رحل ساب البلد
شالوا الحزن زادو السنين
قايل الامل بلسم هناك
يمسحلوا دمعوا الما وقف
يشفيهو من همو الدفين
همو كيف يسعد بيوت
علشانه فات مالى العشم
من حزنو يزرع في الفرح
فى خاطرو كم خطط رسم
عارفاهو ولدك من زمان ما كاس قرش
لا عمروا راد افخر فرش
لا اصلوا بحلم بالبيوت
يبنيها دور من فوقو دور
دايما يقول اصلوا القرش اخرو العدم
بس كان بفتش فى الرحيل
قايل هناك ينسى الحزن
لكنوا خاب املوا اتهدم
يا يمه ليه حكم القدر
ولدك هنا
مسعاهو خاب فقد الامل
ذبلت مراكب الشوق هناك
ضاعت مزامير الغنا
سبتيهو للاسي والضياع
دمعاتو سالت من سنه
رافع اكف الرحمه ليك
تغشاكي في قبرك سنا
يا ربي انت الامر ليك
ارعاها بي عفوك دوام
ارعاها بي عفوك دوام
نجيها من كل العنا
رد مع اقتباس
المشاركة الأصلية كتبت بواسطة محمد الجزولى
(اللهم اغفرلها وارحمها ياكريم
المفضلات