علويه الحشريه 8

[الشمشار]

سلام من الله عليكم بعد غياب طويل لمتلازمه ظروف اتمني انكم تكونو كلكم بخير وصحه جيده
غبت عن المنتدي لكن كنت كل يوم بتاوق وامرق
والسبب انو الشخص مابيمشي بوتيره واحده في حياته
وانا مابكتب الا لامن مزاجي يكون رايق
اها الليله انا رااااااااايق شديد الله يديم الروقه
حا اكتب ليكم عن علويه الحشريه الجزء 8
وعلويه دي انا كتبت منها 7 اجزاء قصدت ان يكون الجزء الثامن اليوم بالتحديد لاهديه لاحدي الصديقات الرائعات في احد المنتديات

بمناسبه عيد ميلادها الكان امس

كدي ارحكم نخش لي علويه المواكبه مواكبه جد الليله

[الشمشار]

اجتمعن النسوان في منزل نوال لمناقشه مايدور في جمعيه نساء الحله الخيريه وياهن ديك مجتمعات وزانقات الرضيه امينه الجمعيه والكواريك والجوطه تجيب الطاشي
علويه
الرضيه انتي قلتي نسوان الحله بدفعن شهري والعده اتجددت 3 مرات السنه الفاتت دي طيب العده وينه ؟ والقروش البدفعنها وين ؟ الجمعيه لافيها لاعده لاقروش
الرضيه
ياعلويه يا اختي انا .....
تقاطعها علويه
انتي بالنيني اليشقك انتي شنو؟
نوال
الرضيه نحن قاعدين لينا ساعتين وانتي ما قلتي ولا كلمه مفيده ورينا القروش وين ؟ والعده وين؟
الرضيه
لكن علويه ادتني فرصه
علويه
يدوك الكووووووووووود (الكود دي البتوع ) انتي ماقاعده من قبيل متل مترجم مدرب الكوره بتتكلمي كلام الطير في الباقير
والله والله والله قروش الجمعيه دي كلها في كرشك الكبيره دي
نسوان الحله لامن رجفن من الخوف والاندهاش من جراءه وصراحه علويه التي كانت ترغي وتزبد
والرضيه هاديه هدوء غريب
انا جاااااااااي الصبر بس

[mahagoub]

دى زنقة كلب فى مولد

[telecom]

عليك الله بطل شحتفة على باباك نهارات الصبر واقفات

[الشمشار]

مقسمه بالله الرضيه دي الليله ما اخليها
هاجت علويه وعبرت عن غضبها بهذه المقوله ونسوان الحله وقفن بينها وبين الرضيه التي اتهمتها علويه علنآ بالفساد
(ده الكلام البتور نفس ناس ابو قنايه )
نوال
علويه روقي الرضيه دي ما حراميه
علويه
ماحراميييييه ؟؟؟؟؟ لا بالله سرقتكم انا اذآ والله الرضيه دي اكلت قروش الجمعيه
في كرشها الكبيره دي
الرضيه
علويييييييه هوووي مابسمح ليك
علويه
مابتسمحي لي سمحت نفسك تاكل الحرام تجي تقولي لي مابسمح ليك تتمسح ملامحك يايمه اصلها ممسوحه يامسنوحه يا ......
(الرقيب قال خلوها مستوره وسترناها)
لي متين نحن في الستر ده
ده الكلام البجيب الهواء
خلونا مع علويه والرضيه التين اشتبكتا وكالعاده علويه اخدت حقها بي يدها وضربت الرضيه ضرب مغسه ومن محلهم داك علي المستشفي
هووووي انا مابحب الكضب
الرضيه الودوها المستشفي وعلويه كالعاده الي حيث جنابو الفاتح
جنابو الفاتح
علويه !!!!!!
ياخ ما ممكن كل يوم انتي جايانا وضاربه زول شكل آخر مره ضربتيني وحبسناك سنه الشمشار اتجرس وقال حا احكي عن منو في المنتديات طلعناك
الليله مالك تاني؟؟؟؟؟؟
علويه
الرضيه ياجنابو الفاتح افتح ليها المادة 351(أ) خيانه الامانه
جنابو الفاتح
وياتو امانه دي الخانتهاالرضيه
علويه تطنطن
وهي الرضيه براها؟؟؟؟؟
جنابو الفاتح
قصدك شنو ياعلويه

علويه
قصدي الرضيه حمتها خفيفه الكلام في ......
(دي انا الحذفتها لانو جنابو الفاتح ماحيقتنع )
جنابو الفاتح
خلينا من اللف والدوران الرضيه خانت شنو؟
علويه
شوف ياجنابو انا ما اتعلمت صاح لكن القانون ده حافظاهو حفظ
وخصوصآالمادة 351(أ) البتقول " كل شخص يكون أميناً على مال عام ... ويتصرف فيه بسوء قصد أو بغير ما تقتضيه الحيطة والحذر ....".يحاكم
هسي حاكمو لي الرضيه دي بي 6 شهور سجن
جنابو الفاتح
الله الله وكمان بقيتي قاضي تحكمي ودايره ينفذو ليك
والله ياهو الفضل
بتأخدي حقك بي يدك ياعلويه
علويه
جنابو الفاتح ماتكتر الكلام بتحاكموها ولا لا
جنابو الفاتح
لا
وحنطلق صراحها كمان
ايووووووووووووووووي يووووووووووووووي يوووووووووووي
كانت هذه زغروده انطلقت من فم علويه لم تكن زغروده فرح بل زغروده دهشه واستغراب واستهجان
لانو اي شئ بقي ماشي بالقلبه
فتكم بي عافيه

[mahagoub]

فايت ماشى وين؟
علويه ما قبضت حقها