خربانة ام بنايا قش
________________________
قصة المثل أن الشيخ كان من الأشخاص المشهورين بالحلم
ولا يغضب أبداً
والكلام ما كان مقنع بالنسبة لي واحد
أصر إنو يزعل الشيخ فرح
مشى لي الشيخ فرح في البيت
لقاهو شغال بيبني في راكوبة من قش
وبربط في الحبال فوق الراكوبة يعني قرب ينتهي
طلع مع الشيخ فرح في الراكوبة وبدأ يفرتق في القش
ويرمي فيهو في الأرض
قام الشيخ قال ليهو قلت كدا؟؟؟
والله خربانة أم بناياً قش
وقعد يفرتق معاهو في الراكوبة ويرمي في الأرض
فأصبحت مثلاً يذكر عندما يتعمد شخص تعصيب شخص آخر
من اقوال الشيخ فرح ود تكتوك عن الدنيا وخداعها_______________________ ______
الدنيا وقت ترشك
ماتصدقها تغشك
يوم تصد منك تكشك
بي مناجلها تحشك
ومن الحكم التى تنسب للشيخ فرح ود تكتوك
العصا أمان من الكلب
والسكين أمان من السلب
وفكة الريق مسمار القلب
والبختا الاجواد بنغلب
من اقوال الشيخ فرح ود تكتوك فى الفخر
قال من قمنا ونشأنا
اولاد ملك وادارة
والجات فى البلد
فينا ماها خسارة
كان جابت حلو
بنقسمو بالمحارة
وان جابت خسام ولطام
تيران ومابننضارة
الزول كان عزيز
اصلا عزيز فى داره
واحسن يمشى بالدرب
المشوه كباره
ياحليلهم ملاك صقايع الفودة
وتيران اللطام الوصلوه هلودا
انصموا الجميع ما انفلوا فى المقدودة
ونقوها البلد من الوسخ والبودة
من حكاوى الشيخ فرح ود تكتوك_________________________ __________
يحكى أن جماعة من تجار العيش أتو إلى الشيخ فرح يطلبون منه أن يبيعهم كمية من محصول السنة . فأحسن الشيخ فرح استقبالهم ولكنه استشارهم فى أن يمهلوه حتى يأخذ برأى العيش، فذهب إلى مطمورة العيش، وانحنى كمن يخاطب العيش يقول:
الخمرى الداخرك لعمرى
اتعشى بيك واصبح مشتهيك
يشير بأن هذه النادرة تدل عام المجاعة، لأنه لم يعرف عن الشيخ أنه كان بخيلا، ولكن قلة المحصول جعلته شديد الحرص
الشيخ فرح ود تكتوك يقول عن السلطان
تب الامير ان ما صدق
وترك المغايس والحنق
تب للامير ان ما عرف
من العديل ما بنحرف
الشيخ فرح ود تكتوك ينصح بالاسراع فى التوبة
ففي مرة دعا صديقا له لان يواظب على الصلاة .. فرد عليه بأنه سوف يواظب عليها بعد ذهاب الشتاء فبادره الشيخ، يذكره بالموت الذي قد يجيء فجأة.
أكان اتهدم القيف
قبال دخول الصيف
عاد الشورة كيف
من حكايات الشيخ فرح ودتكتوك وهو يناظر احد المشايخ_______________________ _________
عندما ناظر الشيخ محمد عبد الحي الذي وصف نفسه مفاخراً بأنه:
أنا محمد عبد الحي
/ أنا النجيض ما ني
أنا ود عبد الحي يابس كداده
خنصر الديك قدوم الجداده
فرد عليه الشيخ فرح ود تكتوك بحصافة وتواضع وذل لله مستنداً إلي وصف القرأن الكريم للإنسان المخلوق من نطفة وضغت في جوف رحم :
أنا فرح الوني
أول أمرى منى
موضوع في محلا شني
لولا فضل ربي الغنى
لا بتلمس ولا بندنى
الشيخ فرح ودتكتوك يرفع من قيمة العمل والكد للرزق
__________________________
كان بعض شيوخ المجتمع السناري، وفقهائه يحتقرون العمل اليدوي ويعتبرونه وضاعة اجتماعية، لكن الشيخ في رسائله الاتصالية يرفع من قيمته ويربط بين العمل والرضا الإلهي :-
أحفر الترس واطبق المحفار
وأرضي بالخدمة في النهار الحار
يرضي عليك الواحد القهار
من اقوال الشيخ فرح ود تكتوك______________________
النسوان تلاتة
مرة .ونص مرة .ومافى مرة
المرة : فى بيتها وبنبرا
ونص مرة : من عتبة بابها ولى ورا
ومافى مرة: ناس السوق يجيبوا خبرا
__________________
[]
منقول من منتديات الهلالية
رد مع اقتباس
المشاركة الأصلية كتبت بواسطة صابر مدني
المفضلات