يجلس ابو الليل كعادته متكئا علي الوساده وهو يعمل بجد واتقان في لفافه امامه وهو يقول لصديقه الجاكومي:-
-ياحبه الليله بدري بدري قبل ماالنمتي العارض ده يجي يكابسنا, يشرب معانا ومابيدفع
-اسي بنشفطا سريع سريع قبل مايجي
وما ان يشعل ابو الليل السيجاره حتي يسمع طرقا علي الباب مترافقا مع صوت يقول:-
-افتح ياابو الليل ريحتكم تجيب الرايح
وبكل اسي ينهض ابو الليل قائلا:-
-النمتي ده كلب بوليسي بس, اسي متين ولعناها, غاتو عارض زي ده مالاقاني اصلو
ويفتح ابو الليل الباب مبتسما وهو يقول:-
-مالك قافل تلفونك, ضربت ليك عشان اعزمك القعده دي لقيتو مقفول
-تصدق انا تلفوني ده زي يد الشحات, فاتح اربعه وعشرين ساعه
يتدخل الجاكومي قائلا:-
-تكون دي الشبكه, بعد خدمه من سته لي ست هدي الشبكات كلها خستكت
ويلتئم الجمع حول عود الند يتناقلون السيجاره فيما بينهم بكل استمتاع ليقاطعهم طرق عنيف علي الباب
-اجدعو الزفت ده سريع, ديل ناس الثلاثه تسعات
-انت سطلت ولا شنو, ديل بيتلبو مابيدقوا الباب , قوم ياابو الليل افتح جاك ضيف
-خلاص لموا لسيجاره دي لمن نشوف ده منو؟
***************************
-وحشتنا ايامك ياراجل والله, تشرب شاي لبن ولا ساده
-والله مستعجل ياابو الليل سادي نبطشيه الليله, قلت امر عليك القاك جهزت القروش
يغمغم ابو الليل سرا (والله انت اخير منك ال 999 اسي يجيبوها ليك من وين) ثم يتابع:-
-ماعندك عوجه بتصلك تب ياعباس
وبينما ابوالليل يفكر في كيفيه الاعتزار يوسوس له النمتي قائلا:-
-اديهو نفسين بينسي اسمو زاتو
-كلامك صاح والله, نشربو نفسين بينسي جا لي شنو, لكن الراجل مسكين ياخ
-وانت مامسكين؟ اسي تجيبا ليهو من وين
-يازول مي هميه, نديهو نفسين والبيحصل يحصل
-لكن هو مابيعرفا
-بنلفها ليهو في سيجاره برنجي
وبعد دقائق كان عباس يحتسي الشاي ويسحب انفاس السيجاره بشراهه بعد ان تلذذ بنكهتها وهو يقول:-
-انا غايتو طلعت من بيتنا , لكن كنت ماشي وين ماعارف
يشير ابو الليل للنمتي اشاره ذات مغزي وهو يقول:-
كنت ماشي المستشفي ياعباس, انت الليله نبطشيه
**************************
يدخل عباس المستشفي مبتسما علي غير عادته ممازحا رجل الامن بالبوابه:-
-اسي بدل وقفتك دي كدي تحاحي في الحريم كان قعدت في الحوادث اشتغلت دكتور مااخير ليك
ويواصل سيره غير عابئ بذهول رجل الامن الذي طالما عهد عباس صارما ليعود اليه بعد ربع ساعه قائلا:-
-عنبر الاطفال بي وين؟
ليرد رجل الامن بدهشه اكبر قائلا:-
-اول ممر علي يدك اليمين
-وانا كان لاقي يدي اليمين كان سألتك؟
-خلاص اول باب بتلقاهو في الممر باب المونيوم كده
ويذهب عباس تاركا رجل الامن يواصل زهوله والنسوه يتسربن للمستشفي استغلال لتك الفرصه التي لاتسنح كثيرا
**************************
يقرأ عباس التعليمات علي ورقه الاقامه القصيره علي حسب هواه
-دخول عنبر الاطفال
-تركيب 24 مقاس فراشه
-اعطاء بنسلين مائي شراب
-اعطاء 400مل فيمتو بالويد خلال اربع ساعات
اعطاء باراسيتامول بالعضل حبه واحده
ثم يقهقه قائلا:-
سمح الفراشه فايدتا شنو؟
وفي الحله:-
-طيب انت وكت عندك القروش ماتمش تديها للراجل
-وبكره نشرب شنو ياالجاكومي كان اديتا ليهو
-رزق اليوم باليوم ياخ , امشي ادي عباس ده قروشو الراجل قالو مرتو عيانه
-ماشي ماشي ياالجاكومي, الحنيه الجاتك فجأه دي
**************************
بعد مرور ساعتين:-
-كدي يامحمد امشي العنبر شوف ناس الديهايدريشن ديل حصل عليهم شنو, اعمل اسسيسمنت وتعال
يدخل محمد العنبر ليجد عباس يحاول تركيب الكانيولا في يد السرير والطفل يبكي علي السرير
حينها يقول عباس براحه كبيره:-
-بركه الجيت يادكتور, البيشن ده مفروض اركب ليهو وريد في فراشتو لكن اظنو مدمن ديازبام, وريدو حجر بس
يتناول محمد الفراشه من عباس ويلقي بها في سله المهلات ويتناول فراشه جديده قائلا:-
-انت عرفناك الليله ياعباس, الشافع ده البيبكيهو شنو؟
وبعد جوله قصيره بالعنبر, يكتشف محمد ان اليوم تحديدا عليه ان يقوم بمهامه كهاوس اوفسير ونيرس ليستدعي عباس قائلا:؛-
-انت امشي نوم انا بمسك منك عنبر الاقامه القصير هده
يرد عباس قائلا:-
-مش كان مسكت العنبر, كان مسكت مني كلب سعران زاتو , قروشي مابخليها ليك
-قروش شنو ياعباس؟
-القروش الادينتها مني الشهر الفات
-هو الشهر الفات انا زاتي ماجيت المستشفي؟
وفي التوقيت المناسب يدخل ابو الليل حاملا رزمه نقديه وهو يقول لعباس:-
-هدي قروشك , قبيل انت طلعت قبل اديك ليها –ويهمس في اذن محمد قائلا- لاتؤاخذوا المساطيل بما يفعلون
يبتسم عباس حتي ظن محمد انه يبكي وعباس يقول:-
-الحمد لله جنيه ماكان عندي
-اها بعد شفت القروش, لسه مصر تركب الكانيولا في يد السرير
يهتف عباس مستغربا:-
-يد سرير؟؟؟؟؟؟ انت سطلت ولا شنو الليله يادكتور
سلسله مسطوله ل- احمد عبد الرحمن محمد حمد
رد مع اقتباس
المشاركة الأصلية كتبت بواسطة ود الضو
علاقة قوية شديد كمان 
المفضلات