بصات المزاد..........

[مايو نص]

الاخوه الكرام
حقيقة نفسى اخش النت وافتح موقع ودمدنى الغاليه
واجد واحد فى المنتدى او اى زاويه يقول انو بصات المزاد اصبحت فى حكم التاريخ واصبحت نسيا منسيا وحولها المتحف الما قومى
بالله واحد يبشرنا وقوام عليكم الله

[مايو نص]

شنو يا اخونا فاتحين لينا كده
ما معقول الكراكات دى لسه شغاله

[HAMADTO]

بسم الله الرحمن الرحيم

السلام عليكم ورحمة الله تعالى وبركاته

تعرف يا مايو نص على ما اظن باصات المزاد مع الركشات و الاتوز والتيكو بتكون وقفت ........
الشباب القاعدين في مدني برضو ممكن يفيدونا اكتر وقفت ولى لسه

[al zeer]

بسم الله الرحمن الرحيم

السلام عليكم ورحمة الله تعالى وبركاته

واذا وقفت نقول عقبال مواصلات مايو نص وطرف حبيب الله
وانتوا عارفين البشيل طلاب الدرجه الصباح شنوا

[114]

بصات المزاد في مدني، وبصات الحله الجديده والسجانه في الخرطوم، هي البصات الوحيدة اللي كانت شغاله ولم تتوقف بان أزمات المواصلات التي حلت بالبلاد بدءا من العام 1978 (أول أزمة بنزين ومواصلات في السودان)، وما بعده، بالتالي هي التي كان عليها التكل، والوحيدين الما عانوا من انقطاع المواصلات هم ناس المزاد في مدني، وناس الحلة والسجانة في الخرطوم
صحيح هي بصات عتيقة لكنها قوية وقطع غيارها معظمها يتم توليفها في الورش العادية في السودان، وقالوا الدهن في العتاقي، لكن بيني وبينكم شكلها ما سياحي، واتمنى انها فعلا تترك المجال للشباب الجديد من ناس تيكو واتوز وماتيز وغيرها من الامجادات وغيرها، على شرط ألا تحدث اي ازمة بنزين او ازمة قطع غيار، حينها نندم على إحالة هؤلاء الشيوخ الى المعاش

[bshagra]

يا اخي البصات دي من ما قمنا لقيناها وحتي محفظ ليها حقها حقو يخلوها تشتغل
والما داير يركب فيها يركب الروزات والتيكو والاتوس

[القدال]

والله ياجماعه لمان الواحد يكون راكب في بص من بصات المزاد
انا بالزات بحس بالظلم الشديد جدا جدا
الله يعين السودانيين المغتربين الماشين اجازات

[ركشة]

زى ما فى الحلو فى المر.........
شنو يا اخوانى دا كلام شنو ........الما عندو ماضى ما عندو حاضر.........
داااااك الحديد الاصلى.وحديد الزمن دا كلو خرد.........
بعدين عليكم الله كدى بصراحة الواحد يركب فيها وهو راجع البيت بالليل ويعيش اللحظة مع صوت المكنة الهادر الذو شجووووون وذلك الجربوكس الذو دفوووووووف......وتلك الفرامل العزبة...وذلك العادم المكندك.........

وانا اضمن له كابووووووووووس

[مايو نص]

هههههههههههههههه قشه
مره يازول البص اتعارض فى نص الطريق وبطل .........طبعا اول حاجه عطل الحركه فى الاتجاهين
وبعد داك نزل ليك الكمسارى بالمنفله الماخمج والله اظن المنفله كانت دركسون تايتنك
والمنفله جارنها بى سلبه ( يعنى حبل متين)
وتسمع وررررر وكررررر وبعد ده كلو البص رفض يدور وقالوا داير دفره
قلنا يا اخوانا دفره لى ابوالهول عديل كده............ خلاص نزلوا النسوان
وحاتك النسوان علشان ينزوا ساعتين تمام طبعا كلهم من الحجم العائلى
المهم فى النهايه لزينا البص برا الزلط وبعد داك دقينا الكدارى للسوق الصغير
حقيقه كنت ماشى العزازه عن طريق كناتر فداسى
المره الجايه بحكى ليك عن كناتر فداسى بس ماتكلم ود الحليماب اصلو ود عمى وجيرانا الحيطه بالحيطه

[ركشة]

قشة يا ود مايو نص...........
ما بالغت فينى عديييييييييييييييل لكن
وانا جاييك يا مزااااااااااااااااااااااااد..

[bshagra]

مايو نص

سلام عليك


قريت الرد الجميل عن معاناة بصات مدني القديمة


ودي اجمل حاجة انو تكون في معاناة

[HAMADTO]

باصات المزاد ما اظنها وقفت لسه ولى شنو

[أبوبكرحامد]

أخونا مايو نص وبقية المتداخلين ,,,,,,,,,,, سلامات

بصات المزاد من سلبياتها ضيق المقاعد وصغر الأبواب مما يعيق الركوب والنزول

كما يصعب مشاهدة الشارع لمعرفة المحطة التى ستنزل بها .

أما الآيجابيات فهى قدرة هذه البصات على العطاء فى كل الأوقات ، ولنا

سكان بانت عشق خاص لبصات المزاد إذ أن مواصلات سنكات جبرونا تتوقف

مبكراً والحل هو بص المزاد وتنزل فى محطة الطابونة قبل اللفة عبر البوابة .

أذكر قبل سنوات خلن كان بخط سنكات جبرونا بص من شاكلة بصات المزاد

وكان سائقه يدعى عباس وكان الدور على بص عباس وبعده حافلة مينى بص

جديدة يقودها شاب يدعى عادل وهو شاب بهى الطلعة ، وكان جميع الركاب

فى انتظار حافلة عادل بينما العم عباس ينتظر حتى يكتمل البص لينطلق وحينما

أحس أن الجميع عازف عن الركوب معه صرخ قائلاً "ده كوم عيش " .

ود الماذون

[ابراهيم]

يا اخوانا السلام عليكم

لغاية السنة الفاتت غايتو بصات المزاد ومايو وحبيب الله كانت شغالة لكن بعد الغزو التيكوي والاتوزي بدأت البصات تتلاشى كما بدأت الهيمنة لسطوة التيكو والاتوس والركشات .. وانقسم الناس بين مؤيد للفكرة ورافض لها وانا غايتو من وجهة نظر رومانسية افضل البصات على التيكو والاتوس والركشات لما تحمله البصات من صفات عذبة كما قال اخونا ركشة رغم الصورة الحضارية والسرعة والراحة في التيكو والاتوس والركشة

ولكم التحية

[أبوبكرحامد]

أتفق مع الأخ ابراهيم فى التمسك ببصات المزاد لأنها تحمل عبق الماضى

وليتنا نكرم أصحاب هذه البصات للدور الذى لعبته فى حل ضائقة المواصلات.

ود الماذون

[ضياء الدين احمد]

يا اخوانا حقو الناس ماتكون عاطفيه وتتمسك بي حاجات منتهيه بحجة انها تاريخ
وكده معليش لو كان مبنى او مدرسه او شئ من ذاك لكن دي ارواح ناس وراحة ناس ومظهر يعكس شكل الشارع والمدينه ونحنا ما بننكر انها حلت مشاكل زمان وانو اصحابها ما قصروا لكن مامعناه نقبلها هسع ودي مشكلتنا كثيرا مانتمسك
بحاجات باليه وكأنها امر مسلم بها او منزله
في حاجات كمان ياخوانا لازم تتغير سوى كانت في حياتنا او في المظهر العام للمدينة ما دامت تقودنا نحو الافضل
ودمتم

[أبوبكرحامد]

والله ياضياء كلامك كلام عقل ، بس نحن ناس كاتلانا الحنية ، فقط أود لو

تدرس الجهات الرسمية مسألة ايقاف هذه البصات عن الخدمة ولاسيما الجانب

المتعلق بطرق تكسب أصحاب هذه البصات وضرورة توفير بدائل تعينهم على

العيش الكريم .

نفس الجدل دار بمدينة الضباب حول إحالة بص لندن العتيق للمعاش وإحلاله

ببصات تتوافر فيها وسائل السلامة .

مع مودتى

ود الماذون