لسه بحلم

[كندشة]

أنا لسه بحلم

أيوه بحلم

رغم الحظ العاثر بحلم

غصبا عن الليل الكاجر بحلم

لما أهجع في الوسادة

ما بكون راجي الصباح

ولاني مفتقد السعادة

ولا بأرقني الألم

بس بشيل هم الحلم
هم المنام من غير حلم
وين المفر غير في الحلم
لأنو كل اليوم ضنك
والعيشة في الحاضر ضنك
الحزن ساكن في السكك
والسكة قدامك حريق
والبحر من خلفك غرق
والماضي توب من الندم
وين المفر غير في الحلم
بحلم معاك انو الوطن
الوطن!!!
أيوه الوطن
ماتندهش
هل تعلم انو أنا وأنت لنا وطن
ماترتعش
وطن الجدود وطن المساكين الغبش
بحلم معاك نبني الوطن
مية متر في برندتين
أوضتين خلف
حوش من تراب
زاهي ومهذب بالرذاذ
راكوبة في ضهر التكل
ديوان كرم
باب للضيوف ما ينقفل
دايما بشوش بالضلفتين
و مرات متاكى على خجل
هل تعلم ان الباب بحس
احساسو تسمعو زي همس
ما بابنا عاشق للشمس
يفرح يزغرد بالفرح
لما الخلوق تدفر تخشو وتمرقو
و يصرخ يصيح لو يتقفل
بحلم معاك بيوم زفاف
يوم ترمي بالفال
على كتيفك طرحتك
و زي لون قليبك فرحتك
يظهر رضاي في بسمتك
يامذهلة
أنا تحت أمرك وامرتك
بحلم معاك بيوم جميل
يوما يطول طول العمر
ونسيم عليل في خصلتك
يرقص يمر دربا مسفلت بالعديل
على ضفة الاسفلت نيل
مرصوف زهور وشجر نخيل
بحلم معاك نسكن عشق
من ألف ميل
والزفة الحان سلسبيل
زفتنا من هنا للبلد
والحزن يصبح مستحيل
بحلم معاك بالعدل يغتال الظلم
واليأس يرحل يستقيل
ونجيب ولد يشرق أمل
انو الشباب يلقى العمل
الحكم يعدل ويعتدل
والجور يغادر ويتمحي
وحاكمنا ينصف ويستحي
بحلم معاك بغيم فتر
يهطل على ديارنا المطر
والموية تنعش أرضنامن غير بعوض
من غير وحل
ومن غير حفر
نلعب مع اولادنا الصغار
نرقص تحت رش المطر
ونغني زي أيام زمان
يا مطيرة صبي لينا ,,, يا مطيرة في عينينا...
صب يا مطر
غسل سواد كل القلوب
صب يا مطر
خلي كل ظالم يتوب
صب يا مطرأنبت قمح هذا التراب
حبا"... نبات ... زهرا"... ثمر
وتكون بلد فعلا وطن
نزرع محبتو في الفؤاد
ونحصد خريف الحب أمان
نخلع سواد ثوب الحزن
وتلف كهاربنا وتسد
نتغطى بلحاف الأمل
على قدر أحلامنا.... للكرعين نمد
والنعمة تظهر في العيون
والخير يدوم والحال يقوم حيلو ويشد
ونحمد الرب ونشكرو
في كل حال ليهو الحمد
ونربي أولادنا الأمان
ونعيش أولادنا الحنان
ننساها دمعاتنا الزمان
كانت صبر مرا" يلوك فينا ويهد
نرضع أولادنا الرضا
نسقيهم الحب والوفاء
عشان نرجع للوطن
قيم الوطن
ترجع شهامات الرجال
وتعود مروءات البشر
بعد ما شاخت شباب
وتأمن الجار سترتك
والخوف يفارق فكرتك
ويعود وطن ضايع سنين
ينبت خدار أرضو اليباب
آه يا حلمي
يا رب نعيش صدق الحلم

[sambaaa]

بحلم معاك انو الحزن غيمة وخلاص رحلت بعيد

[mahagoub]

فلنحلم بغد مشرق
خالى من كل الشوايب
ووطن حنين يضمنا بين جنحاتو
ويتغير نوع وطعم الحلم

[بنت الرفاعي]

ما أجمل الحلم حين يكون للجميع.
و
لسة بنحلم

لكَ التحية أخي كندشة مع الشكر والتقدير.

[أحمد (الغالي)]

إحلم أخي الجميل
فما أجمل ما تحلم به
إحلم
وهل للحلم ثمن ؟؟

[ياسر عمر الامين]

ما الحلم واطلاق العنان للخيال الا امنيات مشروعه يُأمل أن تتحقق على أرض الواقع...وحلمك بالوطن الذى تود أن يكون هو الشرعية نفسها...نسال الله الا تكون احلامك مجرد "شخبطات" على اوراق الخيال وأن ننعم جميعا بوطن حر متعافى.
ولك ودى واحترامى أخى كندشه وبنحلم أن تعود تكتب من جديد.

[كندشة]

♥♥♥ عدنا ♥♥♥

[ياسر عمر الامين]

عودا حميدا مستطاب...وفى انتظار ما تنعم علينا به من وحى احساسك...