سودان المعضلات .. !
-------------------
حكومات رايحات..
وحكومات جايات
والشعب الماشي بالبركات
لاهو عايش ولاهو مات
ومن غرائب المحن والمفارقات
تلقاهم دايماً خارج النص والتوقعات
واقفين صفوف صفوف و بدون مناسبات
في المحاكم والضرائب والمستشفيات
دافعين الثمن وفاقدين الزمن والاتجاهات
وفوق رؤسهم تلعلع الاناشيد والمكرفونات
ومن كثرة التهليل والتلقين والتوجهات
والخطب الحماسية المتخمة بالشعارات
أصبحنا شعب كل الحكومات
قبل صلاة الصبح بي ساعات
المارشات زلزلت الاذاعات
والشوارع لبست كاكي وشالت الرشاشات
الضباط الكبار اصحاب المقامات
والعساكر القنادف المشنقين البوريهات
اولاد الشيخ المحروسين بالفاتحات
قاعدين قدام الكمرات والشاشات
وهاك يا اوامر وهاك يا بيانات
ونحن المخلوعين بنقرأ السبعة المنجيات
قالوا لينا دي حكومة الاصلاحات
حكومة كل الملل والاجناس والديانات
بتوفر اللقمة للجائع وبتصلح العوجات
لعموم أهل السودان المليان بالخيرات
وبعد مرارة المخاضات وعذاب الولادات
عمت المظالم وطفحت السجون والمعتقلات
سجون المنون المسكونة بالاشباح والخيالات
جلادوها لا يبالون من فعل المنكرات
وإرتكاب المجازر والمآسي والموبقات
ادخلونا في غابة كانت مخارجها غابات
شموسها غائبة ودروبها متاهات
وأعمارنا مرهونة بازمات تتلوها ازمات
مجمل القول وخلاصة البينات
سرقوا كل تفاصيل حياتنا في لحظات
والسودان الكان مفخرة أصبح شحات
إتسول في كل المحافل والمواني والمحطات
متين إجي اليوم البنفرغ فيه كل الحسرات
وتفور وتهيج الشوارع المغيبة بالسنوات
وتهتف الحلوق الجائعه بأعلى الاصوات
تسقط تسقط حكومه الدبابات
والعار العار للعساكر والجنرالات
زمن العسكر الما بشكر ولى وفات
وطل علينا الصباح الممهور بالبشريات
صباح الكرامة المولود من رحم الدمقراطيات
مطالبنا متواضعة يا قاده ويا زعامات
رغم الجوع والحق المقلوع وقساوة النكبات
الحريه غاية مطلبنا قبل الرغيف والراحات
أرحمونا من الضرائب والمصائب والجبايات
أسمعونا ياساده كفايه تطنيشات
بكره حتحتاجوا لينا في الانتخابات
وما تخلونا كل ما تتساقط الحكومات
نرجع نقول حليل الكان وفات
زي ماقلنا حليل نميري أبو عا جات
-------الكنزي--------------[/b]
رد مع اقتباس
المفضلات