آخر تقليعات الحكومة

[خالد هاشم علي]

ماشاء الله علي حكومتنا الرشيدة ، كل يوم تطلع قرارات لتسعد بها شريحة المغتربين ، تلك الشريحة المغلوب علي أمرها.
آخر هذة القرارات وقد سمعت عنه من بعض الأخوان أن الحكومة أصدرت قرار بوقف ( التربتيك) وللتوضيح التربتيك هي تمكين المغتربين من النزول للإجازة بسياراتهم والعودة بها بعد نهاية الإجازة نظير دفع مبالغ مالية (500 ريال للدفتر، وحوالي 700-1500 ريال عبارة عن رسوم لصالح الدولة لا ترد).
فلو صح خبر هذا القرار تكون الحكومة تفننت في إيذاء المغتربين بشتي السبل ، وكل مرة تطلع لينا بي حاجة جديدة ، ياحكومة نحن ناقصين ......، يعني ماكفانا غربة وتلتلة و ( مساكنة كمان ) ياخوانا حرام والله حرام.....
فالمغترب يحتاج لسيارته في الإجازة فمعظمهم من سكان المناطق البعيدة ويحتاجون للتحرك خلال الإجازة ، ثم ثانيا المغترب بدفع رسوم بالزيادة عشان يرتاح من المواصلات والجري.
وتحليلي للقرار لو صح الخبر ، إنو يكون في واحد من ذووي النفوذ ( ماأكثرهم) يكون عمل ليهو شركة ليموزين سياحي وشاف إنه نزول المغترب بي عربيته مضر ليهو ولي شركته ، فطلع القرار ده ، وفي إحتمال يكون المسئول اللي طلع القرار يكون هو نفسه صاحب شركة الليموزين.
نتمني إنو يكون الخبر غير صحيح لانه لو كان صحيح تكون الحكومة دي ( ماعندها راس بالمرة) ومابعملوا حساب ولا دراسة لأي قرار يعني الواحد فيهم تهف ليهو حاجة وهو نايم يقوم من الصباح يطلع بيها قرار.
الشكية لي الله.....



ودمتم...


أبو هاشم

[الزبير محمد عبدالفضيل]

فعلا اذا كان هذا الخبر صحيح وفعلا رايحين يطبقوه (((( الرماد كاااال حماد))))))


ياخونا نحنا ناقصين هم وغم من الحكومه دي يعني ما كفاهم ضرائب وزكاة وترع وكفالات ايتام وطلبه والي الخخخخخخخخخخخخخخخخخخخخخ



حسبنا الله ونعم الوكيل علي هذه الحكومه

[أبوريلان]

الأخ خالد هاشم
سلام كتيييييييير

شكرا لطرح هذه المواضيع الهادفة والتى يحتاج لها جميع المغتربين والمغربين من بلدانهم ، أنا سمعت بهذا الخبر وقمت بالإتصال بمكتب شحن فى جدة حيث أفادو بالآتى : فرضت حكومة السودان ضريبة جمركية يوازى سعر جمرك هذه السيارة الداخلة للبلاد تدفعه وأنت داخل وتستلمه وأنت خارج وهذا خطأ كبير ومن سن هذا القانون للآسف لا يفقه شيئا وهذا تخلف لبعض قيادى هذه الحكومة ، لأن المغترب لو كان يملك مبلغ ما يعادل 40 مليون جنيه سودانى أو أقل ما كان موجود فى تلك البلاد التى يلاقى ما يلاقى ، وللآسف الشديد طبق هذا القرار لمدة ثلاثة أيام حيث أمتنع جميع المسافرين للسودان من النزول بسياراتهم ، وعندها تم إستدراك الأمر والرجوع عن القرار والآن يمكنك أن تنزل بسيارتك أخى خالد هاشم ولكن مبلغ التربتيك أعتبره كبير بالنسبة للمغترب ونرجو من حكومتنا النظر فى أمر مبلغ التأمين حتى ينعم المغترب بعطلة ميسرة .

[عزيز عيسى]

يا ودهاشم،

والله موضوع جد مهم وله أثره على أخوانا المغتربين.

على الرغم من أننا بعيدين منكم والموضوع يهم كل أخواننا في دول الخليج، لكن قلبنا معاكم واللى بيمسكم بيمسنا كلنا.

الواحد فينا هنا في امريكا ممكن يأخذ سيارته ويمشي بيها كندا أو المكسيك بدون مايدفع رسوم ولا يحزنون وحتى هو راجع مابدفع الترابه.

ثم ثانيا أدفع ليهم رسوم وضرائب ليه أصلو أنا راكب في ضهرهم ولا راكب عربيتي؟؟؟!

والله كلام عجيب ..

الناس ديل يطبقوا في المواطنين قوانين ونظريات ما أنزل الله بها من سلطان ولم نسمع بها من قبل في أي دولة اخرى من دول العالم. وزي ما ذكرت بأنه المسؤول اللى طلع القرار ده يمكن يكون صاحب شركة ليموزين .. صدقني كلامك ده في الصميم ميه في الميه وما عايز ليه اثنين ثلاثه.

الله يكون في عونكم .. والشكية لى الله.

[ابراهيم]

في بلدك تعيش ضغوط ...

تغترب تسيب اهلك وارضك تفادياً للضغوط

برضو تعيش ضغوط

الله يكون في العون

الله غالب

[امير عبدالباقي]

الاخ ود هاشم
والله الجروح كثيره ولكن ماذا نقول!!!! لكن نحن نستاهل لانو اي قرار تطلعو الحكومه ضد مصلحتنا نستسلم له ونحن صاغرون ليه مانقف ضد اي قرار ضد مصلحتنا ونقول لاجميعا حتي يكون لنا صوت مسموع

[خالد هاشم علي]

سعادة السفير....
زي ماقلت يكون الرماد كال حماد ، وصدقني نحن من يوم ماإغتربنا الرماد كال حماد والله يصبرنا.
الغالي ياسر...
تسلم علي المرور الأنيق وطمنتنا شوية ، وبعد كلامك أنا كمان إتصلت بأحد مكاتب الشحن بجدة وقالوا نفس كلامك بس في إضافة عليه وهي أنو ممنوع إدخال سيارات الكرولا والكامري من موديلات (2004/2005) وممنوع دخول اللاندكروزر بكل موديلاته. طيب ياخي أنا لو عندي واحدة من العربيات دي أسوي شنو يعني؟؟؟؟؟، يعني حتي نوع عربيتي الحكومة تختاره لي ، ومابعيد بعد كده تحدد لينا نلبس شنو ونحن داخلين السودان.
عزيز ياعزيز....
شكراًعلي مرورك وإحساسك الرائع وياريت لو كنا معاكم، كنت أول حاجة أعمل لي جواز أمريكي وأنزل بي عربيتي السودان ونشوف ح يعملوا لي شنو، طبعاً حيتكبكبوا ويتجرسوا لأني أمريكي ومابعيد يدفعوا لي الجمارك من خزينة الدولة.
الغالي إبراهيم...
تسلم ياحبيب والله زي ماقلت هناك وووب وهنا ووووبين، يعني ميتة وخراب ديار، غايتو الله غالب.
أمير( بتاع فريق الحلبة)...
والله ياأمير نحن مفروض الحكومة تعفينا من كل حاجة وكفاية النحن فيهو، طيب ياأمير نفترض كلنا قلنا لا اللي حيحصل شنو؟؟؟؟ ولا حاجة ، ديل ناس ماعندهم إحساس ولا فهم لأنو قرار زي ده يضر بالدولة لأنو كان جايب دخل كبير من هذة الرسوم المفروضة.
الله يكضب الشينة...

ودمتم

[rasheed]

الموضوع يا شباب ما علي الحكومة بتاعتنا بس ،، لأنو وأنا ماشي أقضي إجازة العيد في دولة قطر فؤجئنا بأن الجمارك تطلب مننا حق الخروف (معليش تذكرة تربتيكت بسبعمائة ريال وفي مكتب تاني بخمسمائة وخمسون ريال) وطبعاً يا تدفعها يا ترجع أو توقف عربيتك وما تخرج بيها من الحدود اللي أنت فيها ،، وطبعاً قلنا مجبورة خادم الفكي على الصلاة ،، وشالوا مننا حق الخروف أقصد الجمارك ،، واجعني والله يا جماعة واجعني شديد لهسع مع أنو عيد الضحية فات ليه شهرين لكن كان جاني ضغط يكون منهم ،، لأنو كانت رسوم الجمارك عبارة عن حق الخروف المقترح وكان أول خروف حأضحي بيه في حياتي الزوجية من سنتين لأنو السنتين كنت حاج بيت الله ، وقلت أمشي أضحي في قطر مع أخواني ولكن للأسف ضحوا لي ناس الجمارك ،، والحمد لله العيال صغار لسه ما وصلوا عمر المطالبة بالخروف زينا نحن زمان كان ما جاء الخروف منو البنوم في البيت ؟؟؟ بس نقول شنو شكيتكم على الله يا ولاة أمرنا العظام العظام وربنا يسألكم يوم القيامة من حق الخروف ده ووالله أتيمنت وأتخصمت ما بنساه ليكم ،

[خالد هاشم علي]

والله يارشيد حق الخروف ده حارقك شدييييييييييييد ، وبالمناسبة في السودان وفي اي نقطة تفتيش لوعرفوا إنك مغترب مابتعدي لو مادفعت الفيها النصيب ويقعدوا يماطلوا فيك ويتحكحكوا ويقولوا ( حمدلله علي السلامة 20 مرة) لو فهمت ودفعت كان بها ولو عملت بليد يقولوا ليك أوراقك وين وعايزين نفتش العفش . الله يعينا


ودمت...