متواجدين على اسوار جامع الحكومة كنا نسميهم المساكين
تعالوا يااولاد شيلوا الصحون بتاعت الفتة والتمر المبلول في الجردل دا والحلو مر ودوهم للمساكين جنب الجامع هكذا كانت تقول لنا جدتنا في يوم معين في شهر رمضان من كل عام تعمل مايعرف بالرحمتات صدقة ومغفرة الي اعزائها المتوفين .
كانت الدنيا بخيرها الكل يشرب شاي الصباح باللبن وكمان معاه اللقيمات والذي كان يباع في فريقنا من امراتين اشتهرتا بي ذلك - محبوبة بت ناس سعدابي وبت ام بي – بنت ناس شعبان لو عاوز لقيمات بي شلن أي بي خمسة قروش داير ليك ثلاثة رميات من الصاج دي كمية كبيرة الا يكون معاكم ضيوف دا كله ماحق ناس البيت براهم - والناس تفطر وتتغداء وتتعشي وتشتري السكرزنة رطل ونصف رطل والشاي من الدكان زنة وقية ونصف وقية وشاي بي قرش وفحم يعبي في صناديق البسكويت الفاضية من نوع الميزان او في قوالب من حديد القالب بي قرش الناس تشرب الشاي والقهوة باقل تكلفة .
ديل المساكين المتاحين في ذلك الزمان معهم خيار ثاني هو ان تدعوا اولاد الفريق الصغار الي اكل هذه الفتة وتذكيرهم بان يدعوا للمتوفين وانت جالس بالقرب منهم .
هولاء المساكين كان زعيمهم ود عم فاروق هكذا سمي نفسه وان الملك فاروق ملك مصر هو ابن عمه . كان ود عم فاروق من الفلاته والفلاتة كلمة جامعة تشمل كل من هو اتى من غرب افريقيا كان يحمل فاسا لتكسير الحطب وبقجة فيها كل مايملك من ملابس غير الذي يلبسه كان شماعة متحركة للملابس كان يحفظ اسماء الممثلات المصريات في ذلك الزمان تحية كاريوكا وفاتن حمامة وكان بض سكان ودمدني يحفظونه اسماء البنات السمحات في ذلك الوقت في ودمدني وعند سؤاله من يتزوج يقول لك فلانة بت ناس فلان .
درج اهل المتوفي في ذلك الزمان وفي اليوم الثالث للفراش او يوم الصدقه ان يتم توزيع ملابس المرحوم مع قطع من الدبلان تكفي لعمل جلابية لكل واحد من هولاء المساكين . تراهم متراصين وهم جلوسا حول اسوار بيت العزاء في انتظار توزيع هذه الصدقة .
كان شعيبو متعففا لاياكل من الرحمتات او الصدقة كانه من الاشراف يفضل الاكل من الكوشة علي ان تاتيه صدقة شوف زمان الكوش كان فيها بواقي اكل هاك ياولد ادفق باقي الحلة في الكوشة كانت الثلاجات قليلة وثلاجة المسكين او دواء الكديس هو المشلعيب ودا كان توضع فيه باقي الحلة لغاية بالليل زمان ماكان في واحد بياكل ملاح بايت وماكان في باقات بلاستيك تحفظ فيها بواقي الاكل في الثلاجة ثاني يوم حلة جديدة واكل فريش - كان شعيبودائما مستعدا لنا ويتوقع ان نشاغله كان يضع مجموعة من الحجارة علي اسوار الجامع ناحية جنينة عبدالجليل وشارع الاسفلت كان هذا مكانه المفضل وكان ايضا حريفا في التقاط الحجارة عن طريق اصابع قدميه واذا صوب نحوك حجرا تاكد انه مصيبك به لا محالة .
ظهرت مجموعة اخري من المصابين بمرض الجزام يقيمون في سور جامع الحكومة وهنالك جزء يقيم ايضا في سور جامع البوشي _
تتحدث المدينة عن ذلك الشخص والذي وزع اكياس فتة علي المساكين مخلوطة بي مخدر واستولي علي كل مدخرات السنين بالنسبة لهم يقال انه كان يراقبهم لفترة طويلة وتعرف علي مخزونهم النقدي عن طريق حيلة انه يطلب منهم كل فترة ان يفكوا له مبالغ نقدية كبيرة الي فئات اقل استطاع ان يعرف اين يضعون قروشهم وسهل عليه بعد تخديرهم ان يستولي عليها .
شارك واصبح الزعيم بعد ود عم فاروق عبد السلام ابوليمونه كان له في قفاه كما يقول اخوتنا المصريين مايشبه الليمونه كان لونه ابيض يمكن ان يكون من المغاربة او من سكان عترة – كان يقود المساكين لبيوت المناسبات الحزينة للجلوس علي بواقي الصواني او لنيل الصدقة .
زمن ياكل فيه الناس اقدام الدجاج ويسمونها كوارع دجاج دي كانت اول حاجة بعد ذبح الدجاجة تقطع وترمي في الكوشة – وقال كمان ناكل ساوند سيستم يقصد اذنين البقر الغضاريف وكروم كروم كروم وهاك يامضغ ولكن الذي يحزن ويبكي اكل الفطايس والتي ترمي في اطراف المدينة .
صحيت الصباح بصوت زوجتي قوم قوم رسلوا ليك صور بالواتس ناس مدني كلهم واقفين جنب جامع الحكومة – مالهم كلهم بقوا مساكين - ياراجل قول بسم الله الايام دي بتكتب في شنو في الفيس – قالوا البحر كسر جنب جنينة عبدالجليل وجامع الحكومة جوا اتفرجوا قلت لها لاشعوريا الحمد لله .
رد مع اقتباس
المشاركة الأصلية كتبت بواسطة elfatih
المفضلات