النتائج 1 إلى 2 من 2

الموضوع: وهم الغـربة

     
  1. #1
    عضو جديد
    Array الصورة الرمزية almaknemer
    تاريخ التسجيل
    Dec 2004
    الدولة
    الكريبه
    المشاركات
    93

    وهم الغـربة

    يـا غـربة يـا بكايـة يـا غشـاشـة يـا مسـتهبلة
    تغـرينا بـي درهـم قـروش ووراه قنطـار بهـدلة
    جيناك لي سـنتين وبس أو قـول ثلاثـة نكمـله
    نلقـى المـراد ونودعـك نـرجـع حياتنـا نبـدله
    نبنى البيـوت فـى العاصـمة وبي كـوم أثاث بنجمله
    وكرورنا حارة نخضـره اصـلو التنقـل مشـكله
    غـير القـروش اللي الأهل عـبر الشـهور حنرسـله
    ونكمـل الدين بي مهـل والسـمحة جـاهزة نحصـله
    ناس فكـرت تجـني العلم تـبدا الدراسـة تواصـله
    أحـلام كثـيرة وشـيقـة وآمـال كبـيرة بنأمـله
    لكـن حسـابتنـا الغلـط فـي كـل عـام بنرحـله
    مـرت سـنين مـن العمـر بنعـزها وبنفضـله
    والحسـبة وصـلت طاشـرات ويمكـن نعيش ونـدبله
    تعـال نحاسـبك يا وهـم من غيـر رقـم أو أمثله
    كـان للقروش نجـري ونحوش لكن تقـول بنشـاكله
    ماراضـية تقعـد فـي الجيـوب وتقـول حـرام
    لكن بترقـد في الضـهور بي ديـون تقيلة مطـولة
    ممحوقـة ما بتقضـي الغـرض وأقـل حاجـة تكمله
    كملانـه بطـحاء وحـق وزن ومجامـلات مسـتفحله
    وضـرايب أبعـاج ندفعـا والزامـي حمـدي نحـوله
    وأحلامنا صبحت زي سـراب نمشى ونجري ما نحصله
    يا ريت يكون هـم القروش بس يا غـربة فيكي المعضلة
    لكـن تعـال شـوف الهمـوم المـا افتكـرنـا نقابـله
    ذلـه ومهانـة واحتقـار خلـو النفـوس متملمـله
    سـجن كبيـر فيـه الكثيـر سـجان قيـوده مكبلـه
    أشـغاله شـاقـة ومؤلمـة ودايمـا تكـون مسـتعجلة
    مـا عـاد يكفيهــا النهـار تحتـاج ليـالـي مليـّلة
    أمــراض كتـيرة بـدت معـاك قبـل الألـم نسـتقبله
    ناس الضـغط والسـكري وفـوق الألـم وجـع الكلـى
    مصـران وقرحـة واكتئـاب ونفوسـنا مـا متحمـله
    وبقينــا فيـك كيمـان لحـم تحـت الهـدوم مـتندله
    وأكــيد يكـون أكـل العلـب وأكـل المجمـد عامـله
    عـدم الرياضـة مع المشـي لابـد يكـون ليهم صـله
    وكمـان تعـال لـي معادلـه ما قدرنا أصلو نواصـله
    سـجن العيـال جـوة الشـقق ولا الفـراق للعـائله
    فى كل ظـرف تلقـى القـرف تلقـى الخيـوط متداخله
    جـيب العيال بي جـيبنا مـال وجـيوبنا غـيره مميله
    وصـغارنا صـبحت بالـزهـج متوحشـه ومتجفـله
    لا قـادرة تلعـب فـي خـلا لا ضـل شـديرة يضلله
    ولا قـادرة تـدرس بـي نفس مـن الدروس المـذهلة
    تلقـى الولـد غالبـه الكـلام والبـت كـبيره مـريّـله
    كـل الضـغوط جاتـهم سـوا وما قـدرن ا حتـى نقلله
    أمـا الفـراق أصـل الوجـع ومشـاكله بايتـه مقيـله
    كـل زول مفـارق عـارفو ومافـي داعـى أفصـله
    يـا غـربة ادينـاك كتـير اديـنا خاطـرك سـهله
    خلينـا نـرجـع بالفضـل نلحق حياتنـا نعـدله
    آمالنــا فيـك بـدري اتنسـت إلا الرجـول متوحـله
    وبقينـا زي أهـل القبـور لا البـرة عـارف الداخـله
    لا الجـوة يرجـع لـي ورا ويحكـي الحـقيقة يواصله
    لكـن خـلاص حـان الخلاص عـدك نـزل مهما عـلا
    وان شـاء الله نحيا نودعـك وتكونـى ذكـرى نغـالبه
    يـا غــربة يـا بكايـة يـا غشـاشـة يـا مسـتهبله

    المك نمر
  2.  
  3. #2
    عضو مميز
    Array الصورة الرمزية rasheed
    تاريخ التسجيل
    Apr 2004
    الدولة
    مدني - مواليد ود أزرق - حي البان
    المشاركات
    538

    نغش أهلنا في الصور البنرسله
    قايلين خلاص أولادهم في النعيم مسترسله
    ما عارفين أنو الفي صوره دي كلها ديون متلتله
    وما عارفين كمان ضهورنا أنحت من الهموم المثقله
    وما عارفين أنو ما عاوزين همومنا عليهم نتقله
    ودايرين قلوبم علينا تكون مطمنه


    والله رائع يا المك لكن ما قلت لينا الشاعر منو 00 وكان الكلام ده من عندك ورينا عشان نجي نستظل بواحتك الظليلة والتي بالتأكيد سوف تحمل عنا كثير من الآلام والعذاب والهموم والديون المثقلة ،،،

    نيلك زرعك ناسك أرضك ،، بحبك يا سودان ،، بحبك مما قمت ،، بحبك يا سودان

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  
by boussaid