كباية شاي سادة ....

[Du3ash]

بسم الله الرحمن الرحيم

يا ريت يكون البوست دة مكان تجمع لينا ... نعبر فيهو عن بساطة ود مدني .. وعن ترابط
أهلها .. وتجمعاتم .. وونسات حبوباتنا وأهلنا الكبار .. وحكايات أجدادنا عن الزمن الفلاني..
ونشرب مع بعض كباية شاي ويا ريت تكون سادة .. مع نعناع ...
ونحكي مع بعض بكل أريحية .. بلغتنا المحكية ... عن حياتنا اليومية .. ونناقش صورة المجتمع
بطريقة بسيطة .. وونسات خفيفة .. عاوزين نحيي جو الجماعة .. واتخيل لي دة بلسم للناس
المغتربين .. يلقو جو سوداني بحت هنا .... وح أفتح الموضوع انا ..
وبحضرتكم يحلو الحديث ....

انتو يا اخوانا الحصل في جامعة الجزيرة دة شنو .... والله حيرونا الناس ديل .. ياخي نحن
لآخر يوم قاعدين في الجامعة وحتى كان عندنا امتحان .. الجو رايق روقة شديدة ... فجأة ومن
غير مقدمات اليوم التاني العساكر طردونا ... وما فهمنا حاجة .. انا للآن ما عارفة الحصل شنو

[elshaigi]

والله كباية شاهيك ساخنة .. بس دي الكلام الما بنفع زى ما قلت في البداية انو نحن باعتبارنا برة البلد محتاجين نسمع كلام زي دي لكن للان أنا شايف الكباية واحدة مع انها منعنعا وكدي حتخلونا نتقريف بسرعة وما تنسي كمان أنا شايقي ...

الشايقي

[الزمن المريح]

تسلمى اخت دعاش اكرر اخــت دعاش ،، موضوعك بالجد مهم و لكن ياريت يكون نقل احداث لا ننا نحن كما ذكرتى خارج الوطن ،، و الاخبار دائما تصلنا بعد فترة ،، اعنى الاخبار على حقيقتها ،، فاخبار امدرمان ما منها فائدة ،، و البقية محظورين ،، يعنى جامعة الجزيرة و اغلاقها بارك الله فى الاخ كبير المشرفين حمدتو ادانا ليها طازة ،، لكن السبب ،، علموا عند الله و الوالى ،،

و العساكر المجانين ديل بقوا يدخلوا الجامعة ،، سبحان الله ،،

اها كيف مدنى و كيف الجزيرة ذاتها خليك من جامعة الجزيرة ،،
قبال ما تردى علك الله سوى لينا جبنة و جيبيها لينا تحت الشجرة ديك الجنب الترعة ،،
مع وافر التحايا ،،

[مزوني]

المشكلة كلها يا جماعة سبب الاتحاد وما الاتحاد
الطلبة دايرين يكونوا اتحاد والجامعة ما عايزة تعملو ليهم السنة الاتت كان في مزاملة بين طب واقتصاد عشان يعملو اتحاد بي صورة سلمية وعلى اساس انهم زي ما بيقولو عمدة المجمعات حقتهم "مجمع الرازي(الاعدادية) ومجمع النشيشيبة"
وباءات المفاوضات بالفشل
المرة دي الحكاية هاجت في 500 جنيه"تقدرو تتخيلو حتة زي دي؟
واحدة من اخواتنا البنات في النشيشيبة نقصت رسومها 500 جنيه
وكان اخر اليوم واخر يوم في التسجيل
والمسجلين حلفو ما يقبلو منها الفلوس الا كاملة ووصفوها بأنها مستهبلة وكذابة وكلام من النوع دا
المهم البنت شكت وبكت واستنجدت بالطلبة ولكن بعد ما فات الاوان لقت الشبابيك قفلت ولما جات تاني يوم قالو ليها تعالي السمستر الجاي بدري
وطبعا بدا البكى والكواريك ولمت الناس
وبدت المطالبة بي وجود الاتحاد وادارة الجامعة رافضة الحتة دي
الطلبة جبرو الادارة بالاعتصام وكلام زي دا
الومنها الحكاية جرت
دا الشفناه بأم أعيننا
والله على ما اقول شهيد
ولكم خالص تحياتي

[الزمن المريح]

الله يخليك اخى مازن
اولا لماذا ترفض ادارة الجامعة فكرة الاتحاد
ثانيا الم يكن معلن من قبل رسوم التسجيل للجامعة
ام ان رسوم الجامعة ارتفعت فى دلك اليوم بالتحديد؟؟
لماذا لا تكون رسوم الجامعة بواسطة كبونات بنكية او بريدية او شى مثل هذا


و الله يا ماذن الطلب اصبحوا يعيقو انفسهم بنفسهم ،، فالاتحاد ما معناه اننا نقف لكل شى من قرارات الادارة ،، و نتخطى لوائحها و قوانين الجامعات ،،

نعلم اننا اما تحديات كبيرة و معظم موظفوا الجامعات بل اقولك كلهم بدون فرز و فى كل الجامعات معينين بشى من المحسوبية و الوساطة و .......

و لذكل تجدهم يعيقوا العمل او الاجرآت أكثر من تسهيلها ،،،

و الله يكون فى عون الطلبة و اهل الطلبة ،،،،،

[قمر الزمان]

السلام عليكم
اولا لكي التحية اختي دعاش ..
بالنسبة للجامعة نفس الشي نحن ما عارفين الحاصل كان شنو في النشيشيبة
اما عن الاعدادية فكانت مشكلة ناس تخدير و مشاكلهم مع الجامعة وكدا
لكن نحن بالجد في حاجة للاتحاد ما عشان نقيف لكل قرار من قرارات الادارة
ونتخطى لوائحها لكن في حاجات كتيرة تاني .. اما الوصلنا في انو الجامعة
قفلت فقالو لانو في شغب في وحدة من الكليات في الهلالية وابو حراز ...
على العموم كلها ايام وتفتح ان شاء الله ..
لكم تحياتي اخواني وشكرا على الشاى يا دعاش ..

ودمتم

[امير عبدالباقي]

الاخت دعاش مشكوره علي الشاي بس كبايتي مامليانه الشاي خلص ولا شنو

الشي العرفتو وسمعتو قالو في مشاكل في واحده من كليات الهلاليه لكن الحصل شنو والمشكله شنو اخربني ماعارف والله جامعه الجزيره دي من زمان جنها اضرابات وكلام زي ده
لكن المحيرني كل الجامعات فيها اتحادات ليه بس جامعه الجزيره عشان في مدني يعني حكم والله
شايك كمل امشي جيبلينا شاي موش انتي العازمانا
ونواصل

[مزوني]

بعد التحية والسلام
أخي الزمن المريح وباقي الاعضاء
اولا مشكلة الرسوم زي مانت عارف ما كل الطلبة تتوفر عندهم الرسوم
والاتحاد كان كفيل انو يتم الرسوم
لكن الللة في عدم وجود الاتحاد يجيك المسجل اللي هو غالبا يكون خريج شهادة سودانية يتفهك ويسمعك 100 كلمة فارغة انت في غنا عنها
وفي حالة وجود الاتحاد ممكن زي المسجل دا يلقى نفسو في الشارع
وبعدين حكاية انو الادارة رافضة قصت الاتحاد دي لي؟
زي ما بقولو ناس النشاطات السياسية انهم عصابة ومستولين على فلوس الطلبة
اللي هي الدبلومات "ودا حق شرعي وحق من حقوقهم وما بنقدر نقول في حاجه"
لكن يالله تعال شوف قروش إيجار الكفتريات ووووو دا كلو حق من حقوق الاتحاد اللي هو حق الطلبة هم بتقاسمو بيناتهم "كان هي أفقر كلية في جامعة الجزيرة كلية نسيج"
عميدها راكب عربية بي 250 مليونبالعقل دي من وين مع مراعاة انو دي اصلا قروش طلبة وغير انو الطلبة عندهم كثير من الشاكل ما بيلقو البيحلها ليهم والادارة ما بتشتغل اطلبة الشغلة وكل همها دفع الرسوم وبس
يعني ابسط حاجة عندك مشكلة اول سؤال تكون متوقعو"انت تامي رسومك ولالا؟"
يني لو ماتامي رسومك ولا تفكر انك تفتح فمك عشان تحل مشكلتك والكلام كتيييييير عن الموضوع دا
لكن الله غالب وعلى العموم قالو الجامعة حتفتح ي شهر6 انشاءالله
ولكم خالص تحياتي
وسلامتكم

[الزمن المريح]

لك التحية اخ مازن
و ينك يا دعاش لمتين نستنى الشاى و الله انا كان ما مازن زمااااااااان كنت مشيت ،،،،

الاخ الغالى مازن ،، الكل يرفض ان تكون ادارة الجامعة فى ايدى تتلاعب بمستقبلها و ان كان الامر يقف عند اكل إيجار الكفتريا الخ .. فمافى مشكلة ،، اهى ايام و تتعدى ،، و اما ان يسمعك كثير من موظفوا الادارة كلام فارغ بخصوص الرسوم و ماشكلها ايضا نتحملها و ان يركب عميد الكلية سيارة فاخرة فهى مفخرة للكلية ،،

لكن يا مازن هل المستوى و الدارسة جيدة ،، هل الطالب الجامعى يعى دوره و مايحاك ضده ،،
ايدى الحكومة الاختبوطية امتدت لكل مناحى الحياة دمارا منقطع النظير و كان اولها التعليم العالى و التعليم بصف عامة ،،
جامعة الجزيرة فى قلب السودان النابض (مدنى) مهد النضال و شرار النصر فبالتأكيد لن يتركوا ان يكون لها اتحاد طلاب و ان قام شغلوه بكم هائل من المشاكل ، فعليكم ان تحاولو ايجاد البدائل فى حالة غياب الاتحاد ، فمثلا ،، الجمعيات و الاسر و الروابط الاقليمية ،، و ما شاكلها ،، او حتى بشكل فردى تجمعوا امضاءت الطلبة لحل قضية معينة مع ادارة الجامعة


و لبعدين نتلاقى ،،
ودعتك الله ،،

[Du3ash]

ازيكم يا شباب حبابكم ألف تحت شجرتنا ... يلا يلا اقعدوا تحت الضل الهادي دة
عليكم الله شوفوا الجو مغيم كيف ... أيوة أقعد يا مزوني أهو البنبر جنبك .. وانت يا الزمن المريح
وأمير ( بملا ليك كبايتك ما تخاف ) أقعدو جنبو .... وقمر الزمان تعالي جنبي هنا يا حبيبة
رصي لي الكبابي دي في الصينية ... اهلا بالشايقي تحياتي يا ود العم .. اتفضل .. الليلة عاملة
ليك شاي تقيل وما هو خفيف ..

تسلموا يا أحبة على الطلة الرايعة .... وجودكم أضاف رونق لهذا البوست .. تحياتي للجميع ..
دمتم في دواخلي

[Du3ash]

الاتحاد فعلا عندو أهمية للطلبة وبساعدهم لأبعد الحدود ... وفعلا يا الزمن المريح
في جمعيات موجودة بتحاول بقدر الامكان تسد فرقة لاتحاد .. زي جمعية رابطة الطلاب مثلا
بتحاول تساعد لكن ما عندها الامكانيات ولوائح ومصادر بتدعم شغلها زي دور الاتحاد ..
مع انو نحن برالمة لكن فهمنا انو الاتحاد عندو دور مهم .. واول ما نزلنا كنا بنقول دة شنو
القومة والقعدة دي كلها عشان الاتحاد ؟؟؟؟ .....
والعرفناهو من الناس القدامنا انو الادارة رافضة تدي الطلبة الاتحاد عشان تلهيهم بمشاكلم
عن حاجات تانية ممكن تقوم بيها الادارة ... وأكيد ما في مصلحة الطالب ....
مثلا زمان الطالب كانت موفرة ليهو كل الامكانيات المفروضة عشان يدرس كويس .. زي
الداخليات كانت على مستوى يليق بانو يقعد فيها طالب والوجبات المتكاملة والكتب وحتى الدفاتر
والاقلام كلو موفر للطالب .... يعني ما على الطالب الا الدراسة والمزاكرة بس .... فقامو الطلبة
يطلعوا لحل مشاكل أكبر من كدة حتى اتدخلو في شغل الحكومة والمعارضة ضد الحكم والاحزاب
السياسية ... ومثال لي كدة ثورة 21 اكتوبر قامو بيها طلبة ضد النظام الكان سائد ....
وحسي لم الادارة وافقت على الاتحاد حددت ليهم مواعيد قصدت انها تضارب مع مواعيد
الامتحانات عشان الناس تنشغل عن الموضوع وبعد الامتحانات اجازة السمستر يعني حاسبينها
صاح .....

....................................

شنو يا جماعة الشاي برد أشربو وبعدين نواصل ....

[Du3ash]

انشاء الله تديم قعدتنا تحت الشجرة ما يقومو يجو يكشونا تاني بعد كشة المرة
الفاتت في السوق الكبير ... أصلو ما عارفة الناس ديل حصل ليهم شنو .. يدفعو الناس ضرايب
على قعاد الشارع اتخيلو حتى ناس الدرداقات بدفعو ضريبة ... على شنو حقو الواحد يمشي يأجر
محل عديل ما دام ح يدفع في النهاية .. بدل ما ينظموا الناس ووفروا تعب كل الناس ...

بالمناسبة الليلة في اضافات .. يعني زلابية مأسسة ح تدعو لي أنا متأكدة ... ولي الشوايقة في
قراصة من الشمالية عدل ... بس أسرعو الشاي دة ح يبرد بالطريقة دي ....

[مزوني]

على عيني وراسي
انا الليلة يا الزمن المريييييييييح بدرس في كلية العلوم الرياضية والحاسوب بمجمع الاعدادية
وانا لو قلت ليك اني استفدت حاجة من الجامعة والله العظيم اكون كذبت عليك
كلو اجتهادات شخصية مني برا برا
والكلام كتيييييييييييير وممكن تسأل أي زول
ولك التحية
وتسلمي أختي دعاااااااااااااااااااااااااااش
ونوااااااااصل

[الزمن المريح]

سلام عليكم ،، اخ مازن و اخت دعاش ، و شكرا على اللقيمات الحار ،، و يا ريت تكثرى من....

اخوتى الاعزاء ،، عندما اخترتنا الدراسة خارج السودان كان احد الدوافع المنهج الدراسى ،، و السياسات الخرقاء ،، و مشاكل الجامعات السودانية ،، الخ..
و الحمد لله ايام و عدت ،، لكن صدقنى يا مازن فى اى مكان الدراسة الجامعية تتوقف على الطالب و الاستاذ او المحاضر يعطيك القليل و الجهد الكبير دوما من الطالب ، و لكن يمكنك ان تستفيد من معلمك او المحاضر فى مساعدتك فى المواد و المراجع و خارج المقرر ,,

و بصراحة الحاسوب بحر عميق جدا ،،
و نصيحة لك و انت الان فى اول الطريق اختر احد الافرع الاقرب الى نفسك و طور نفسك فيها و انسى الباقى ،، يعنى لو برمجة برمجة و بس و فى لغة حية
و لو تصميم تصميم و بس ، و لو شبكات ،، الخ...

اما موضوع الضرايب يا اخت دعاش ،، فالضريب اليضربهم ، فدية مشكلة الجميع فى الداخل و الخارج و نحن نعمل من اجل اهلنا و لى الحكومة و اللجنة الشعبية الخ لكن ليها حلاّل و الله يعين

اخى مازن ماهى المواد التى تدرسونها فى قسم الحاسوب