كانت بتبيع الروب قدام مدرستنا . . ختبا واحد من أولاد الخرتوم . . زول بتاع جرسة و زوغانات . . و مع عندو أي كلمة . . فسخ ختوبتو منها بعد شهرين . . قال ليهم انتو غشيتوني . . أم بخوت دي وكت ختبتها نخرتا ما كانت قدر كدي . . الشيء دي كبرت . . و انا النصيحة لله الخوفة دخلت قلبي . . خايف أجيب لي منها كوم عيال نخرينن زي كيزان الكنافة . . في شان كدي أنا بستسمح خاتركم تدوني اغراضي . . و تاني أي قرداً يطلع جبلو . . بعد فسخان الختوبة من ود الخرتوم . . الكلام كتر عن نخرة ام بخوت و كيزان الكنافة . . و تاني مافي راجل كشكش قال دايرا . .
عبد الجليل ود عمها . . برضو نخرتو كوز كنافة . . دق سدرو قال بعرسا . . قام عرسها بعد اسبوعين من فسخان ختوبتا من ود الخرتوم . . دخل عليها . . حملت منو . . جاب منها استاذتنا ست بهية . . و زي ما بقولوا العرق دساس . . بهية برضو جبدوها بي كوز كنافة في نص وشها . .
بتذكر اليوم داك مشيت المدرسة . . كنت جيعان . . قلت عيلا اشتري لي كباية روب من أم بخوت . . شلت قروشي و مشيت ليها . . جيت لقيتا زعلانة . . و الزعل باين في نخرتا . . عاينت ليها و عاينت لي جردل الروب بتاعا . . لقيت روبا باير . . حننتني و دموعي جرن . . قلت ليها يا أم بخوت بدل كباية اديني كبايتين بتاعات روب . . أم بخوت فرحت بي . . بايعتني كبايتين . . و ادتني نص كباية هوادة . . كرطعتهن سريع سريع و دخلت المدرسة . . الساعة النزل فيها روب أم بخوت دا في بطني . . عرفت روحي اني اتسرعتا . . بطني بدت تروري بي . . و شعرة جلدي كلبت . . و أي حتة في جسمي قعدت تنتش فيني . . اصحابي جوة المدرسة شوف عيني سغااااار . . حتى خليل البوم الدبة شفتو سغير و ضعيفوني . . ام بخوت دي يا ربي باعت لي روب و الا شيتاً تاني . . يكون مريسة؟؟ . . الشيء دا مو روب بس . . ممكون تكون خالطاهو . . قعدتا قدام مدرستنا ذي قعدت ست خمارة . . ما بعيد يكون روبا دا خالطاهو . .
جرجرت كرعيني . . دخلت الفصل و عيوني مزغللات . . جاتنا ست بهية . . أول ما الحصة بدت . . الطشمة حصلت . . و راسي قعد يسوي في النتاحة . . السبورة بقيت شايفا طشاش طشاش . . و ست بهية ما شايف فيها شيء عيلا الدهمة بتاعت نخرتا . . راسي بقى تقيل . . وكت غلبني أشيلو . . وقع مني في الكنبة . . تاني ما حسيت بي حاجة . . ست بهية تدرس فينا . . و أنا طشمان . . و نااااايم . . وكت الطشمة فكت . . رفعت راسي . . سمعت ست بهية تقول . . الواحد فيكم يا أبنائي لو ما عندو أنفة و عزة نفس ما بساوي تعريفتين في الزمن دا . . تاني يخربني ما سمعت منها حاجة . . النصيحة لله كلام ست بهية خلعني . . و حيرني جنس حيرة ما يعلم بيها عيلا الله . . طيّر لي لفة الراس و الطشمة بتاعت روب أمها أم بخوت . .. .
طلعت من المدرسة و انا أوزن في كلام ست بهية الغريب دا . . افتكرت كلمة أنفة القالتها ست بهية دي معناتا نخرة طويلة . . قلت في سري . . ست بهية دي غبيانة و الا شنو . . هي الأنفة فايتاها وين . . بيتهم غيرالأنفات فوقو شنو . . تاني حاجة الناس دي كلها عندها أنفات . . اها في داعي ست بهية دي تقول لينا خلوا عندكم أنفة؟؟؟ . . هي ذاتها الأنفة بتاعتا يرك فوقا ودابرق . . لكن بعد دا هي استاذة مسقفة . . و كان الأنفة ما مهمة ما كان أمها فسخو ختوبتا اللولانية عشان أنفتها شبه كوز الكنافة . . البركة في عبد الجليل ود عمها غتى بيها قدحو . . عبد الجليل أبوها ذاتو شايل ليهو كوز كنافة قدر الضربة في نص وشو . . و شخريهو نص الليل زي التقول بشرط ليهو في توب دمورية . . سليمان اللطرش الساكن حدانا . . الانفة بتاعتو طلعتو من الالزامية . . و حسي في أمان الله . . شغال في شركة البترول . . و بتول بت جاد الله . . كانت بتأشر بيها و تناغم بيها النسوان في بيوت البكاء . . و حنان جارتنا . . الانفة بتاعتها زي فتحت التنشين بتاعة البندقية . . دفعوا مهرها . . خمسة مليون جنيه . . جنيه ينطح جنيه . . و الشيلة جابوها ليها بي لوري ود الشينة . . و ست بهية دي ذاتها حنان جارتنا ضوقتا من الشيلة الجابوها ليها . . كان كدي ست بهية دي حاسدة الناس دي في الأنفات بتاعتن . . و بكرة و حاااااات أبوي كان اقعد ليها في الكنبة اللولانية . . و امد ليها أنفتي مترين . . كية ليها . . النشوفا بتسوي شنو . . مش انفتي؟ . . امدها زي انا ما داير . . لو سالتني عامل كدا لي شنو؟؟؟ . . اقول ليها أصلو عندي أنفة . .
اليوم التاني . . جيت اول واحد في الفصل . . قعدت في الكنبة اللولة . . و مديت ليها نخرتي . . ست بهية جات . . رفعت ليها راسي فوووووق . . و نخرتي فندرتها ليها زي فتاشة العيش . . قعدت تعاين لي . . ما قالت حاجة . . بس استغربت . . و اللستعجاب ركبا من فوق لي تحت . . قعدت تدرس فينا . . وكت تسعلنا سعال . . انا أرفع يدي فووووق عشان اجاوب . . و نخرتي أرفعها فوق لي يدي . . و اعاين ليها بي رشرش عيوني . . ست بهية الغبيانة تعاين لي و تعاين لي توبا و فستانا . . قايلاني قاعد أعاين لي حاجة تانية . . عيلا لكن عرفت روحا غلتانة . . حيرتها عديييل كدي . . و انا مبسوط . . قلت ست بهية دي حا تبقيني الطالب المثالي . . و بكرة تطلعني في نص طابور الصباح . . و تقول للطلبة . . فيفيد دا يا أولاد مثال للطالب العندو أنفة . . صفقوا ليهو . . و تديني جايزة كراس عربي دبل و استيكة و قلم رصاص و مسطرة . . لكن ست بهية الحاسدة ما اشتغلت بي في الحصة . . و لا عبرت انفتي دي . .
اليوم التاني جيت المدرسة الصباح بدري . . و جاتنا ست بهية في الطابور . . قالت لي خليل البوم . . يا خليل أطلع في نص الطابور . . خليل البوم طلع من نصنا يتقلّب زي ضكر البطة في مشيهو . . قالت لينا . . يا أولاد خليل دا هو الطالب المثالي السنة دي . . لأنو عندي أنفة و عزت نفس . . قامت أدتو جايزة كراس عربي دبل و استيكة و قلم رصاص و مسطرة . . انا النصيحة لله زعلت . . و كنت داير اقول ليها ظلمتيني . . كان تعملي لينا مقارنة بين انفتي و انفة خليل البوم . . لكن قلت في سري . . تكون بقرانة من أنفتي دي ؟
رد مع اقتباس
المشاركة الأصلية كتبت بواسطة aborawan
المفضلات