[align=justify]البارح انا واقف قدام المرايا . . غازي كوعي في نصي . . و قاعد اعاين و اتمعن و اتفرّس في عويناتي . . أتاريهن عويناتي ديل حلوات جنس حلا . . و عاجباتني جنس عجب . . هن أحلى شيء أداني ليهو الله . . عيني الشمال . . دايماً فرحانة و سعيدة . . لا سبب و لا سبيبة . . فرحانة كدي بس . . صحيتي من الصباح . . منها و ليها تقعد تفرح و تتبسم . . بي ظروفا . . هو انا خسران شيء؟؟؟ . . خليها تفرح و تتبسم و تنبسط . . كلو أجر و عافية . . أخير من قعاد ساي . . و احسن ليها من الزعل و التصرصر و مد القدوم . . بس أنا شخسياً . . عيني الشمال دي . . بعتمد عليها في امور المعاينة و المتاوقة . . النصيحة لله في الحتة دي مريحاني شديد . . و عافي منها و رضيان عليها دنيا و آخرة . . بس الجبانة بعد مرات عندها الغتاتة و الدغالة . . زيها و زي عيونا الناس التانين . . قاعدة تخذلني في أحلك الظروف . . خسوساً وكت أجي أشاغل بيها البنوت . . الجبانة أصلو ما قاعدة تنستر معاي في الحتة دي . . وكتين أجي أشاغل بيها و الا اغمز بيها لي بت . . قاعدة تعصلج معاي . . قدر ما أجي أقول أقفلها . . تأبى تنقفل . . و تزعل مني . . و تقعد تصرصر لي و تمد لي في قدوما . . تقرب تنط من الجحر بتاعا . . وكتها التزعل عصب جبهتي يتشحّط . . و لونا يبقى أحمر من الزعل . . زي الدفقوا لي فيها ملعقة شطة . . اليوم كلو تحرقني و توووجعني . . العويرة قايلة نفسها بتعاقبني . . بعد مرات أكون قاعد أحضر في نشرة اللخبار . . عيني الشمال تتكيف . . و تصفق من شدة الفرح . . خسوساً وكتين يجيبوا ليهن تفجيرات إرهابية . . الحكاية دي خوفتني . . في اللوال وديت عمايلها دي لي النزعة الدينية . . قلت ممكن عيني الشمال دي تكون محجبة و ملتزمة و انا مو داري . . و أمور المسخرة و اللولوة بتاعتي دي ما داخلة ليها مزاجها . . دا كلام حلو جداً . . بس المخوفني . . و قاطع قلبي . . حالة التكيف و الفرح . . البتقع فيها وكتين تشوف ليها تفجيرات ارهابية . . يكون دا من شنو؟؟؟ . . تكون دي بداية فكر إرهابي؟؟؟ . . الله يستر . . محمد جانا ما تغشانا . . بكرة تقوم تبقى لي عين بت لادنية . . و تجي بكرة أمريكا تصنفها لي ضمن العيون المتشددة . . و يقوموا يرسلوا لي ناس حكومة اللنقاذ فريق تفتيش عيون . . ناس حكومة اللنقاذ ما قاعدين ينستروا مع السودانيين . . من يسمعوا أمريكا جاياهم . . يقوموا يصدروا بيان بقفل عيني الشمال . . و تحديد تحركاتي . . و يمنعوني من السفر . . لحدي فريق التفتيش اللمريكي ما يرفع تقريرو . . فريق التفتيش بعد ما يفحصوا عيني الشمال . . يمشوا و يجوني صادين بعد يومين. . يقولوا لي يا فيفيد عينك الشمال دي عين متشددة . . و لازمن ننكتا من جحرا . . حتى نقتلع الارهاب العيني دا من جذوروا . . و في حالة اعتراضك نسجنك و نرميك في قوانتنامو . . قسم العيون الارهابية.
عيني اليمين عسللي . . مريحاني جنس راحة . . الله يريحا عليها دنيا و آخرة . . هي عكس عيني الشمال . . عيني اليمين مع انو سغيرونية . . و مضبلنة. . و جفونها مرخية . . عيلا هي بتاعت شرشحات و زوغات . . بعد مرات أصحى من النوم أقعد افتش ليها ما ألقاها . . انا أقوم انخلع . . و قلبي يقع تحت ركبي . . أقول ممكن ربها أخدها . . لكن بعد شد و جذب و مط و معافرة . . ألقاها غاتسة و متغتية بي الجفون . . اديها نخسة نخستين تقوم تجيني ناطة . . تقعد ترمش لي و تبربش لي في رموشها . . متكيفة . . انا في الساعة ديك اتكيف جنس كيف . . عيني اليمين دي . . ماشة علي حل شعرها . . و عندها خبرة ما بطالة في الغمز و المشاغلات . . يعني ما قاعدة تخذلني في الحتة دي ذي عيني الشمال. . مريحاني تب. و لمن أقعد في نشرة اللخبار . . تزعل شديد الزعل . . وكتين تشوف ليها تفجيرات إرهابية . . انا جوة نفسي بكن لي عيني اليمين دي كل الود و الاحترام. عيلا انا الخوافة اليومين ديل دخلت قلبي . . خايف بكرة تقوم تحصل مضايقات و مهاترات . . بين عيني اليمين و عيني الشمال . . نتيجة الاختلاف الروحي و الفكري.
غايتو الواحد تعب من كترة المعاينة و التفرس في المرايا . . انا حسع جاتني فكرة . . المرايا دي أقوم أكسرها و أريح نفسي.[/align]
رد مع اقتباس
المشاركة الأصلية كتبت بواسطة aborawan
المفضلات