طبعاً غريبه انى اكتب عن سيد اللبن بس بالجد هو شخص مهم مؤثر فى حياتنا من كل النواحى اولها الغذائيه لانو مافى بيت يخلى من اللبن (انا من عشاق اللبن طبعاً) تانى الاجتماعيه لانو ناس الحله بعرفوا مستواك الاجتماعى من حلة لبنك بتشيل كم رطل وييييك وهلما جرا كدى نرجع لى سيد اللبن .
الشخص البكون اول الطارقين للباب من الصباح بتصبح بيه ست البيت من فتحت عينها من النوم بتقوم جاريه عليه بالحله ما تهتم بانها تلبس كويس وهو ما برفع عينو بعاين ليها لابسه شنو فى احترام متبادل فى صمت بيناتهم والغريبه الواحده منهم لو جاء راجل ماشى بكل عفويه بتقول ليه ( هى سجمى الراجل) وتروح قافله الباب عليه وبعرف تقريباً كل اخبار البيت العيان منو والابه عشاهو منو والماهيه اتصرفت ولا لسه فى تفاهم غريب بين ست البيت وسيد اللبن هو البحدد مزاج ست البيت يعنى لو نقص اللبن شويه تكون ست البيت زهجانه وصاره وشها وتلعن سيرته وتطير عيشتو ياخ زيد هو لبنك زاتو بتزيدو مويه عامل ليه بنسلين هنا تثور ثائرته ويخلف باغلظ الايمان انو لبنو صافى (وبيور) .
كل المهمن اطورت مع تتطور الحياه يعنى زمان كان بجى بالحمار ابو تنكتين وتانى اتطور شويه عملها عربه كارو فيها فتحه فى النص عشان الزباين كترو واسى فى الزمن العلينا بقى يجى بى بوكس ومرات بكون اخر موديل على الرغم من انو فى اللبان مبستره وعلبه وتجيك مفوره الا انو كل كل الاسره تحرص على اللبن الطبيعى المقنن ويشرب صباحاً ومساء .
يبقى سيد اللبن شخصيه اساسيه ومهمه فى حياتنا .
رد مع اقتباس
المشاركة الأصلية كتبت بواسطة عشوشه
المفضلات