الليل هدأ و النسمة تغفو في دريبات البلد تنجم
قمر هيمان يغازل في ربا ام درمان بدور و انجم
و صوت غناي يداعب الناي يقالد الليل باحلى نغم
و حلق بي جناح الشوق و حرك في دواخلي الم
***
و سافر خاطر و الاحلام و مد الشوق شراع الليل
و طال الليل و طال بالحيل و ليل الغربة فيه الويل
و عربد في دواخلي حنين لشوفة الطيبين حنين للنيل
حنين للشمس لما تغيب و ترسم للماقي اصيل
حنين للساقية لما تدور حنين للمطرة لما تشيل
حنين للنومة في هباب بعد مطراً دعاشو عليل
***
حليل اهلي و حليل بلدي و حليل قلباً حنين و اصيل
حنانك يمة وادي وسيع ربوع ممتدة مليون ميل
حليل النيل لما يغازل الشتلات و يقالد في شمالنا نخيل
حليل حلفا و ربوع مدني حليل روعة جنان كسلا و حليلا اويل
حليلكم انتوا يا طيبين بعدكم ياما عشت ذليل
اصالة و طيبة جود و كرم صفاة موروثة جيل عن جيل
و فيك دايماً بقول و بقول و برضي كتير عجزت اقول
مهما عشت يا سودان عمري العشتو فيك قليل
مع تحياتي
ناصر الباشا
الطائف- السعودية
المفضلات